[A:22]bas khas blangs te/ ston pa rnam sbyar bltab ste 'phangs su sngas bcug ste mnal lo/ maunggal gyi bus shAkya'i sngon gyi rigs rgyud mthong ba'i ting nge 'dzin la zhugs nas/ de las langs te stan bshams pa la 'dug nas shAkya rnams la smras pa/ 'jig rten 'di zhig pa'i tshe sems can phal cher 'od gsal gyi lhar skyes nas sogs bskal pa dang po 'chags pa'i tshul/ rgyal po dang po byung ba'i bar rgyas par bshad nas/ /rgyal po mang pos bkur ba'i tshe mi rnams kyi ming sems can zhes bya/ de'i bu 'od mdzes te de'i tshe mi la tshur shog shog ces zer/ de'i bu dge ba de'i tshe mi la rme ba can/ de'i bu dge mchog de'i tshe mi la sprin mgrin/ de'i bu gso sbyong 'phags de'i tshe mi la tA la'i rkang / de'i spyi bor sha rmen cig byung ba las nga las nu de yi tshe mi la yid las skyes/ rgyal po drug tu mi tshe lo dpag tu med pa yin no/ nga las nu'i brla g.yas par sha rmen byung ba las 'khor los sgyur ba'i rgyal po mdzes pa/ de'i brla g.yon par sha rmen cig byung ba las 'khor los sgyur ba nye mdzes/ nye mdzes kyi rkang pa g.yas par sha rmen cig byung ba las 'khor los sgyur rgyal mdzes ldan/ de'i rkang pa g.yon par sha rmen cig byung ba las nye mdzes ldan te/ de bzhi ni gling bzhi nas gcig gi bar la dbang ba'i 'khor los sgyur rgyal lo/ nye mdzes ldan gyi bu bzang po nas kun nas 'od zer gyi bar ming smos pa sum cu/ kun nas 'od zer gyi bu brgyud la rgyal po brgya tham pa yul gru 'dzin du byung ngo /