[A:260]dbus pa grong po che ste pha gsum dang / stod mo rdo rje mtsho/ bzang mo dkon ne/ shab mo lcam cig 'chad mo nam mkha' dang mo bzhi ste/ bdun gyis grub pa thob/ gzhung gi bshad pa tshar phyin pa lha rtse'i gyi ljang dbu dkar ba/ shab kyi brag rtse so nag pa/ 'phrang 'og gi dbrang ston dkon mchog rgyal po/ sa skya'i 'khon dkon mchog rgyal po/ mnga' ris pa gsal ba'i snying po ste lnga'o/ /de ltar slob ma mchog rnams grangs su byas kyi/ rab tu byung ba dang khyim pa shin tu mang po la chos gsungs/ 'gos lo tsA ba dang mar pa lo tsA ba gnyis kyang khong gi slob ma yin/ mar pas/ dpal myu gu lung gi dgon pa ru/ sgra bsgyur 'brog mi lo tsA la/ sgra thad klog skad kyi yig tshad bslabs/ khong bka' drin mi chung che bar 'khums/ zhes gsungs/ 'on kyang gdams pa chung ngu re la'ang yon chen po dgos par mthong / des rang nyid rgya gar du 'gro ba'i thugs skyes shing byon no/ /'gos kyis kyang bla ma chos la dam pas/ rang nyid panTi ta mang po la gtug snyam nas/ grwa sa de nas byon no/ /de ltar na bla chen 'di ni gdams ngag dang bcas pa mang du gsan pa'i yon tan dang / bskyed rdzogs gnyi ga la brtan pa thob cing / rlung gi stobs kyis nam mkha' la skyil dkrung 'cha' ba/ 'chi ba lam du byas nas sku lus de nyid ma spangs par sangs rgya bar bzhed na'ang / sras rnams kyis spur sbyong ba sogs byas pas rten 'brel cung zhig ma 'grig ste/ bar dor phyag rgya chen