[A:273]du rab tu byung / mtshan rin chen 'od zer du btags/ 'phags yog dus gsum la mkhas/ de 'og rgyal chung ste/ yang khyed bla ma la brten nas mdo sgyu 'phrul sems phyogs gsum ga la mkhas pa zhig byung / de 'og seng ge rgyal po ste/ rma lo dang pu hrangs pa dang ga rong lo tsA ba dang rngog rnams la lo tsA bslabs shing mkhas par mkhyen pas/ tshad ma kun las btus pa rang 'grel dang bcas pa bsgyur zhing / ding sang gi bar du tshad ma ba rnams de la brten pa yin/ chos chos nyid rnam 'byed kyang tshigs su bcad par bsgyur snang / dka' bzhi shes shing / dbus su yungs dkar bre phyed dang gsum gyi grangs dang mnyam pa'i grwa pa bskyangs/ phyis ri bo rtse lnga la gshegs te/ de nas phyir ma byon/ 'byon khar dam pa sangs rgyas la zhus pas/ zha ma/ pha drug gtan yul ni min/ rtse lngar song la 'gro ba'i don gyis shig de nas 'o skol pha spad dga' ldan du dus bya'o gsung ngo / /de 'og ma gcig yin/ de yang rma lo tsA ba de/ jo bo rje lha gcig bod du byon nas mnga' ris su lo gsum bzhugs rjes shing pho spre'u'i lo la 'khrungs shing / bcu dgu bzhes pa chu pho stag gi lo la ma gcig 'di 'khrungs/ sku lus la spyir padma can gyi mtshan rnams dang / bye brag tu lte ba na padma dmar po rtsa ba gsum pa/ nu ma gnyis kyi bar na rin po che'i phreng ba gsum skor du yod pas lte bar sleb pa/ phrag so gnyis la g.yung drung ris re/ rna ba gnyis kyi rgyab na dung padma ltar 'khyil ba re/