[A:280]rtsa dgu pa/ rje mar pa'i lnga bcu rtsa gcig pa yin te/ de dus nam byon pa'i bye brag shes par 'gyur ro/ /ma gcig gi ming po rje 'khon phu bar grags pa de yang / lo bdun brgyad nas yab mched la yig klog dang bi brta yang bslabs/ gnyam pa'i drung du dge bsnyen gyi sdom pa dang smon 'jug gi sems bskyed pa mnos/ spyod phyogs kyi gzhung che phra mang po gsan/ khong gi gsung nas khyod lo tsA legs po zhig bslabs/ gzod rgya gar du phyin nas panTi ta mkhas pa zhig spyan drangs/ chos bsgyur zhing 'gran zla med pa zhig byed dgos gsung bas lo bcu bzhi lon pa la rong zom chos bzang gi drung du byon/ smra sgo sogs mkhas par bslabs/ rma lo tsA bas skad rigs mang po mkhyen pas khong la yang sbyangs pa mdzad/ de dus rgya gar na a bha ya dang / dpal sbas dang / ti pu dang / sun ya shrI dang / rgyal ba can rnams dang / bal po na pham mthing pa dang / ye rang ba dang / a nu lya badzra dang / bal po lo han rdo rje rnams grags pa che bas/ de rnams kyi spyan sngar 'byon par bzhed pa la/ rma'i zhal nas/ nga las gdams ngag che ba med/ khyed lcam sring dang las kyang mthun pas gdams pa tshang ba zhig ster gsung bas/ shab tu rma'i phyags phyir byon/ rma la gsol ba byung nas lo gsum du mnyel ba'i bar dang / de gong du gzhan mang po la chos rgya chen po mang po gnang ba thams cad mnyan/ rma gshegs rjes dgongs pa rdzogs thabs rnams kyang mdzad/