[A:286]'khor la log nas/ 'khor rnams gcig gis gcig bsad/ bla ma a tu las khro chu'i pha bong bdun rta rnga nyag gcig la btags te nam mkha' la bzhag pa/ mu stegs pa stong gis phab kyang ma phebs par nam mkha' la zhag bdun lus pa rnams mthong / zhag 'ga' na bod kyi spyan 'dren gyis sleb/ gnyan lo dang dngul chu bas g.yon las 'gal ba'i mi mgo thams cad bla ma la phul/ phyis rtsod pa med pa'i dums legs par gnang / de la sogs pa'i bstan pa'i bya ba rgya chen po mdzad bzhin pas/ dgung lo drug cu pa chu pho stag la gshegs/ chu stag 'di la chos rje sa skya panTi ta 'khrungs pa yin/ lha rje zla ba 'od zer gyi rnam thar/ ka ba dar seng gi slob ma bod phrug gcig la shes rab che bar grags pa jo stan dbang phyug grags kyis mdzad pa las/ 'dir rags bsdus shig bkod pa yin no/ /
rma lo tsA ba'i chos brgyud ni/ rma'i lcam mo rma bza' rin chen 'bum zhes bya ba'i sras mtha' bzhi lo tsA ba zhes bya ba rten dge bsnyen du bzhugs pa zhig gis/ rma'i phyags phyir rgya gar du lan gsum byon/ rma dang / mtha' bzhi dang / zangs dkar lo tsA ba rnams kyis kha che dgon pa ba la bde mchog gi dbang stabs cig tu gsan/ mtha' bzhis dus phyis mtsho lung / me dge 'phan yul stag mgo/ dar yul gyi gnas khang rnams su sgrub pa yun ring du mdzad/ lo drug cu rtsa lnga la dar yul gnas khang du gshegs so/ mtha' bzhi lo tsA ba'i lcam mo mtha' bzhi bza' chos sgron gyi