[A:289]snga/ glang ri thang pa rnams la yang gsan pa mdzad/ gra thang du dge bshes rgya la dbu ma gsan/ blo sbyong la 'bad pa byas pas sgom skyon zhig byung ba/ pu to ba la sogs la zhus kyang ma phan/ zhang po mon gyis rma'i bde mchog dang / jo mo'i byin rlabs mdzad pas legs par phan yang pu to ba'i spyan sngar byon nas lo bcu bzhugs/ pu to ba gshegs nas glang ri thang pa la lo drug bsten/ de nas mon gyi thang du lo gsum bzhugs/ dge bshes mon 'das nas 'phags pa sku khams ma bde bas/ rang gi slob ma rngog brtson seng bya ba rma'i chos skor rtsad gcod pa la la stod du btang bas/ rma'i jo mo yin zer ba zhig dang / nye gnas yin zer ba gnyis gdams pa che zhing / khyad par lam 'bras la mkhas par 'dug ces thos nas/ sngon la rngog la zhu rten bskur te snyan gsan phab/ phyis 'phags pa rang gis byon nas lha rje ma lcam sring la gdams pa rnams legs par thob/ de nas dbus su byon te slar 'bul ba skyel du yang byon/ slar log nas rong gi mtsho lung du lo gsum mtshams bcad de bde mchog gi bsnyen pa bye ba bcu gsum bskyal/ yang dben dang 'gar brag gnyis la lo gnyis bzhugs/ bsnyen pa mang du bskyal/ yang bla ma lo ro ras chung ba dang mjal bas/ khyod la pha khu sangs rgyas gnyis 'dug khyod rang byang chub sems dpar 'dug gsung / lo drug cu rtsa drug bzhes pa lcags mo lug gi lo la ngas lo bcu bdun la rab tu byung / sku mched