[A:294]zhig mdzad cing / bye brag tu yab dang lha rje zla ba'i 'od zer gyi dgongs pa rdzogs par bya ba'i phyir/ mal gro rgyal bzangs sgang gi gtsug lag khang brtsigs/ lha zhal 'phrang gi 'jigs pa zhi bar mdzad/ rgyal bzangs su dge 'dun bza' mi drug cu tsam bsdu thub/ skye bo rnams 'di'i mkhar las kyi ched du ji tsam pa'i 'bu sbrang zhig shi na zer ba la/ de rnams 'grongs pa'i gdeng med na nga mkhar las ga la byed gsung / de la sogs pa phyag bzhes dang gzhung gdams ngag gi sgo nas phan pa rgya chen po mdzad de/ dgung lo lnga bcu rtsa brgyad pa glang gi lo'i mjug tu gshegs/ glang 'di me mo glang ste 'bri khung chos rje gshegs lo/ rma lo 'khrungs nas 'di'i bar du lo brgya bdun cu rtsa bzhi song ngo / /dge 'dun stong phrag brgyad tsam la 'dad chen po mdzad/ sku gdung gzhu bas thugs dam rnam gsum la sogs pa'i lha sku bdun dang / ring bsrel grangs med pa yang byon/ de nas gdung khang chen po mtho sum cu rtsa lnga pa bzhengs te/ des kyang bla ma'i bya ba byed par 'gyur ro/ /zhes pa sprul sku yang dben pa'i lo rgyus dbang phyug gzhon nu zhes byas mdzad pa las/ 'dir phyogs tsam zhig bkod pa yin no/ /de dag gis rma lo tsA ba dang zha ma lcam sring gis bstan pa ji ltar bskyangs pa'i skabs so/