[A:328]pa re 'dus/ gzhan gyi gnod pa byed pa byung na yang spyir dge slong khas nyen/ bye brag tu byang chub sems dpa' khas nyen gsung nas gnod lan ye mi mdzad/ chos ni lam gyi sgron ma gtso bor byas nas/ gzhan mdo sde'i rgyan dang byang chub sems dpa'i sa/ bslab pa kun las btus pa dang spyod 'jug skyes rabs dang ched du brjod pa'i tshoms la nan tan du gsung pas/ bka' gdams gzhung drug tu grags/ gzhan yang bstan bcos shin tu mang bar gsung / bshad pa mdzad pa na tshig gcig kyang phyir ma lus par/ nyams len kho na dang sbyar nas 'chad/ sku tshe'i smad la po to dgon pa btab ste bzhugs/ phyag rgya chen po skad pa 'di mdo ting nge 'dzin gyi rgyal po'i don yin/ 'o skol ni de la smod par yang mi bya la 'jug par yang mi bya gsung nas/ jo bo rje'i chos 'ba' zhig gtso bor 'dzin/ nga'i don gyi mkhan po ni rwa sgreng gi dge bsnyen rgan po der snang gsung nas/ rwa sgreng du ma byon gong gi rang gi sdom pa yang so so thar pa dngos su mi brtsi/ 'khor ba la nges 'byung ma skyes kyang rab byung gi bslab pa blangs pa rnams phyis nges 'byung skyes pa na so thar mtshan nyid par 'gyur ba bzhed pas/ de la sdom pa gnas gyur zhes grags/ bka' gdams zer ba'i sgra bo che de yang khong gi ring nas grags pa yin zer/ rnam thar gtsang ba dang khyab pa yang po to ba yin/ khong rang gis 'phags pa'i gnas brtan yan lag 'byung du yang zhal gyis bzhes/ khong ni lcags