[A:342]de'i rjes su lha zur khang pa ni/ jo bor gyi sras su me mo glang la 'khrungs/ lha brag kha ba'i zhabs la gtugs nas/ dge bsnyen gyi sdom pa mnos/ mkhan po lhag ru ba chen po dang sbas pa ston gzhon gyis slob dpon mdzad nas rab tu byung / mtshan dbang phyug ye shes su btags/ de nyid las byams chos dang tshig 'jug la sogs pa gsan nas thogs pa med par mkhyen/ mkhan po lhag ru ba la mdzod gsan nas tshogs su gsungs/ me mo phag la gdan sa mdzad nas bzhi pa la gdan sa gtad/ mthar rang lo drug cu rtsa gcig pa me glang la gshegs/ thugs ljags spyan g.yas 'khyil gyi dung la sogs pa'i rten ngo mtshar can mang du byon no/ /
de'i rjes su lha blo gros 'od ni/ mang mnga' bdag grags pa rin chen dang / yum lha gcig rdo rje'i sras che shos su shing mo bya'i lo la 'khrungs/ lo tsA ba grags pa rgyal mtshan dang / slob dpon kun dga' la sogs pa la dbang gdams ngag mang du gsan/ de nas lha zur khang ba'i zhal brdas spyil bur byon nas/ zur khang ba la dge bsnyen gyi sdom pa mnos/ mkhan po lhag ru ba dang sbas pa ston gzhon gnyis kyis mkhan slob mdzad nas rab tu byung / dgung lo nyi shu pa la mkhan slob de gnyis las bsnyen par rdzogs/ zur khang ba la gzhung gdams ngag ma lus par gsan/ bye brag tu blo sbyong don bdun ma sogs grags pa dang ma grags pa'i snyan brgyud dang / kha che paN chen nas brgyud pa'i gdams pa zab mo rnams gsan/ sbas pa ston