[A:347]
spyan snga nas bya yul ba'i skabs/
spyan snga tshul khrims 'bar ni/ yab dbas shAkya rdo rje/ yum li mo ye shes sgron gyi sras su su sa pho stag gi lo nyan gyi snang ra sgang du 'khrungs/ byis pa'i mtshan stag tshab 'bar/ nyi shu pa la rwa sgreng du byon/ 'brom la bsten/ de rjes rnal 'byor pa/ dgon pa ba/ rnal 'byor pa shes rab rdo rje rnams la bsten/ lo bcu gnyis lon pa'i tshe gtsang nas rnal 'byor ma gong mo sgang pa bya ba zhig gis gdams pa btab byung ba de'i tshad du skyol ba tsam ma byung ba la/ dgon pa bas slob dpon klu sgrub kyi rim pa lnga zhig gnang bas des de'i tshad du skyol gsung / lor lo drug bzhugs/ de rting snyug rum du lo gsum bzhugs/ dgung lo drug cu rtsa drug pa chu mo lug gi smal po zla ba'i nyer gcig la gshegs/ 'di ni byis pa'i dus nas stong pa nyid la nges pa skyes shing / thugs rab shin tu che bas sam skr-i ta chos bsgyur bar nus pa tsam zhig kyang mkhyen/ bod du byung ba'i gsang sngags 'di ma bzlas pa med bya ba tsam gyi bzlas pa song / jo bo'i pad spungs la dpe mdzad nas rin po che las pad spungs kyang shin tu mang ba bzhengs/ sA tsa mdzad pa yang phyogs gcig tu spungs na ri'i di'u tsam 'ong zer/ nus pa yang dpag tu med cing chos skyong rnams kyis kyang tshur 'changs byas pa yin/