[A:369]ba sogs gsan pa rgya cher mdzad/ bya yul du sangs rgyas jo bo la sleb/ der bsnyen rdzogs mdzad/ sangs rgyas ston pa la bya yul ba'i chos skor tshang bar zhus/ de'i dus su gsang sngags bka' babs kyi skor kham pa lung pa nas bka' chad nas med pas/ mon lug mgo steng na zem tshe ring mo ba'i slob ma sgom pa byang skyabs bzhugs pa la bka' blangs nas/ zhe gsum pa me pho stag la bya yul gyi gdan sar phebs/ phrin las dar rgyas shin tu che/ rang lo lnga bcu rtsa lnga sa stag la gshegs/ de'i rjes su rgyal stengs pa sangs rgyas dbon por grags pas zla ba bco brgyad gdan sa mdzad/ de'i rjes su btsan gro pa tshul khrims mgon po ni/ 'khrungs yul ka bas/ sangs rgyas jo bo la sleb nas rab tu byung / gdams pa rnams sangs rgyas ston pa la zhus/ 'dis lcags sbrul nas chu mo yos kyi bar gdan sa mdzad/ chu yos kyi de ma thag pa'i shing 'brug la bu ston rin po che gshegs/ de'i rjes su spyan snga blo gros rnam dag pa/ de'i rjes su rgyal stengs pa spyan snga chos kyi rdo rje/ jo bo rje bod du chu rta la phebs nas spyan snga chu lug la gshegs pa'i bar lo drug cu rtsa gnyis/ de rjes tshul khrims mgon po chu yos la gshegs pa'i bar lo nyis brgya dang lnga bcu rtsa dgu de rjes shing 'brug nas da lta'i me pho spre'u yan la lo brgya dang bcu bzhi 'das par shes par bya'o/ /spyan snga nas bya yul ba'i skabs so/ /