[A:45]grong khyer dang ljongs rnams dang rgyal po'i pho brang gis brgyan nas/ thams cad la phan btags shing kha che ba de dag dga' bar mdzad nas/ bcom ldan 'das kyi bstan pa rgyas par mdzad de/ bstan pa yongs su bskyangs nas sems can rnams la phan pa mdzad de/ 'phags pa sha na'i gos can la bstan pa gtad cing / rdzu 'phrul gyi cho 'phrul bstan nas yongs su mya ngan las 'das so/ 'phags pa sha na'i gos can gyis kyang gar gyi rje zhes bya ba'i tshong dpon gyi bur/ mgo bo'i ri bo la gtsug lag khang mdzad nas/ 'phags pa nyer sbas rab tu phyung zhing bsnyen par rdzogs nas dgra bcom par gyur te gnas pa las/ de la bstan pa gtad de yongs su mya ngan las 'das so/ 'phags pa nyer sbas kyis kyang bdud sdig can btul te/ phug srid du khru bcwa brgyad pa rgyar khru bcu gnyis par gnas nas/ de'i gdams ngag bdun gyis dge slong rnams kyis dgra bcom pa nyid mngon sum du byas pa'i thur ma rnams kyis bkang ngo / bar skabs der mya ngan med ces bya ba stobs kyis 'khor los sgyur ba'i rgyal po byung ste/ bcom ldan 'das kyi bstan pa la dad pa phyi phyir thob nas/ 'phags pa grags pas dge ba'i bshes gnyen byas pas/ bcom ldan 'das kyi mchod rten gang yin pa rnams dang nyan thos kyi yang ste/ de rnams la so so so sor gser gyi rgyan phul lo/ /byang chub kyi shing la yang de bas ches lhag par rab tu dang ba skyes nas bkur sti chen po byas te/ gser dang dngul dang bai DUrYa dang