[A:50]bas de'i ltas so/ /spre'u rgyal por dbang bskur ba ni/ de'i dus su rmongs pa rnams rgyal por dbang bskur ba 'byung bas de'i ltas so/ /mi bco brgyad kyis ras yug gcig bgos pas so so'i lag tu ma nyams par byung ba ni/ shAkya thub pa'i bstan pa sde pa bco brgyad du gyes kyang thams cad rnam par grol ba'i skal ba can yin pas de'i ltas so/ /skye bo'i tshogs 'dus nas 'thab rtsod byed pa ni/ shAkya thub pa'i bstan pa rtsod pa'i chos kyis nub par 'gyur bas de'i ltas so/ zhes bya ba'i don 'di 'byung ngo / /nyes pa dgu po rnams ni yul sna tshogs pa rnams su byung nas yun ring zhig tu lon te sde pa bco brgyad du gyes pa yang / rgyal po mya ngan med kyi ring la rtsod pa'i rkyen 'ga' zhig gis gyes te/ 'di ltar/ dang por gnas brtan pa dang dge 'dun phal chen pa gnyis su gyes/ phal chen pa yang rim gyis dge 'dun phal chen sde pa dang / tha snyad gcig pa dang / 'jig rten las 'das par smra ba pa dang / mang du thos pa ba dang / btags par smra ba pa dang / mchod rten pa dang / shar gyi ri bo pa dang / nub kyi ri bo pa ste brgyad do/ /gnas brtan pa yang rim gyis bye ba na/ gnas brtan pa nyid la gangs ri pa zhes kyang brjod pa dang / thams cad yod par smra ba nyid la rnam par phye ste smra ba'am/ kha cig mu run ta ka ba zhes zer ba dang / gnas ma'i bu ba dang / chos mchog pa dang / bzang po'i lam pa dang / kun gyis bkur ba la kha cig A banta ka pa yang zer/