[A:773]spyan snga rdor rgyal ba bskos nas chu sbrul gyi bar lo nyi shu bzhugs/ de nas da lta'i me pho spre'u'i bar du lo gsum song / spyir na g.yam bzang chos rjes me glang la 'khrungs nas me pho spre'u yan la lo sum brgya dang brgyad song ngo / /gdan sa 'dir lha bsod nams 'od zer pa'i ring la bla ma sa skya pa rin chen dpal gyis bskul ma dang zhal bkod mdzad/ gtsang pa nam mkha' byang chub pas bshad nyan mdzad nas da lta'i bar du 'chad nyan gyi srol ma chad do/ /g.yam bzang pa'i skabs so/ /
chos rje gtsang pa bu chen gdan rabs dang bcas pa'i skabs/
dpal phag mo gru pa'i slob ma rje btsun gling ni/ myang stod rig pa'i 'byung gnas kyi bzhengs kyi glang po sna na gling stod smad gnyis las gling smad pa/ yab rgyal po skyab be bya ba sngags kyi sgrub skor mang du mkhyen zhing sman dang rtsis kyi yon tan gyis 'tsho ba zhig yod pa de dang / yum gzus mo dar chung gi sras su sa pho spre'u la bltams/ mtshan padma rdo rjer gsol/ gzhon dus su 'bri klog mkhas par mkhyen/ lo brgyad pa la lha rje ra sman la zhing gcig phul nas sman bslabs pas mkhas par mkhyen/ bcu gsum pa la yab gshegs/ bcu bdun lon pa'i tshe slob dpon gling