[A:773]སྤྱན་སྔ་རྡོར་རྒྱལ་བ་བསྐོས་ནས་ཆུ་སྦྲུལ་གྱི་བར་ལོ་ཉི་ཤུ་བཞུགས། དེ་ནས་ད་ལྟའི་མེ་ཕོ་སྤྲེའུའི་བར་དུ་ལོ་གསུམ་སོང༌། སྤྱིར་ན་གཡམ་བཟང་ཆོས་རྗེས་མེ་གླང་ལ་འཁྲུངས་ནས་མེ་ཕོ་སྤྲེའུ་ཡན་ལ་ལོ་སུམ་བརྒྱ་དང་བརྒྱད་སོང་ངོ༌། །གདན་ས་འདིར་ལྷ་བསོད་ནམས་འོད་ཟེར་པའི་རིང་ལ་བླ་མ་ས་སྐྱ་པ་རིན་ཆེན་དཔལ་གྱིས་བསྐུལ་མ་དང་ཞལ་བཀོད་མཛད། གཙང་པ་ནམ་མཁའ་བྱང་ཆུབ་པས་བཤད་ཉན་མཛད་ནས་ད་ལྟའི་བར་དུ་འཆད་ཉན་གྱི་སྲོལ་མ་ཆད་དོ། །གཡམ་བཟང་པའི་སྐབས་སོ། །
ཆོས་རྗེ་གཙང་པ་བུ་ཆེན་གདན་རབས་དང་བཅས་པའི་སྐབས།
དཔལ་ཕག་མོ་གྲུ་པའི་སློབ་མ་རྗེ་བཙུན་གླིང་ནི། མྱང་སྟོད་རིག་པའི་འབྱུང་གནས་ཀྱི་བཞེངས་ཀྱི་གླང་པོ་སྣ་ན་གླིང་སྟོད་སྨད་གཉིས་ལས་གླིང་སྨད་པ། ཡབ་རྒྱལ་པོ་སྐྱབ་བེ་བྱ་བ་སྔགས་ཀྱི་སྒྲུབ་སྐོར་མང་དུ་མཁྱེན་ཞིང་སྨན་དང་རྩིས་ཀྱི་ཡོན་ཏན་གྱིས་འཚོ་བ་ཞིག་ཡོད་པ་དེ་དང༌། ཡུམ་གཟུས་མོ་དར་ཆུང་གི་སྲས་སུ་ས་ཕོ་སྤྲེའུ་ལ་བལྟམས། མཚན་པདྨ་རྡོ་རྗེར་གསོལ། གཞོན་དུས་སུ་འབྲི་ཀློག་མཁས་པར་མཁྱེན། ལོ་བརྒྱད་པ་ལ་ལྷ་རྗེ་ར་སྨན་ལ་ཞིང་གཅིག་ཕུལ་ནས་སྨན་བསླབས་པས་མཁས་པར་མཁྱེན། བཅུ་གསུམ་པ་ལ་ཡབ་གཤེགས། བཅུ་བདུན་ལོན་པའི་ཚེ་སློབ་དཔོན་གླིང་