[A:814]dpal ba las rtogs pa thob/ gzhan chos kyis 'brel ba'i bla ma ni shin tu mang / bye brag tu chos rje shes rab dpal bas phu bo shi ba'i shul na gser mang po yod pa/ nyin cig dol mdar bsod snyoms pa byung ngo cog la bzhi nam re bkye/ lhag ma gser mang po yod pa nam mkha' bzang po la bskur nas sgom chen pa sgrub rgyags med pa dang / mtshan nyid pa slob gnyer gyi rgyags med pa rnams la dum re phul/ bla ma bzang po rnams la 'byor ba che yang gser 'bul ba gyis gsung nas/ gsung bzhin bsgrubs te skyi shod nas sa skya'i bar gyi bla ma rnams la gser phul zhing gdams pa zhus pas/ bla ma dang gdams pa shin tu mang / chos rje nam mkha' bzang po bas dang por glang lung btab/ phyis chab tshen khar bla ma'i gdan sa mdzad/ skyes mchog pas mu tig btab/ rnam pa gnyis kas chos don du gnyer ba'i slob ma mang du bskyangs/ lho brag tshun g.yor phyogs 'brog dang bcas par 'brug pa'i bstan pa gzung ba yin no/
yang rgyal ba yang dgon pa'i dngos kyi slob ma rin po che rgyal mtshan 'bum zhes pa'i rtogs ldan de ni/ 'khrungs yul la stod/ chung ngu nas yang dgon pa dang mjal/ dad pa thob ste rab tu byung / dgung lo bcu drug pa la phyag rgya chen po'i rtogs pa 'khrungs/ phyis grub chen u rgyan pa la sogs bsten/ sgrub pa'i rgyal mtshan yang legs par btsugs so/
de'i slob ma la stod pa shes rab mgon po yin te/ gdung g.yung /