[A:847]rgya chen po'i rtogs pa bskyed par mdzad pas rdzogs pa'i rim par yang bzhed do/ /dwags po rin po ches ni/ las dang po ba dbang bskur ma thob pa dag la yang phyag rgya chen po'i rtogs pa bskyed par mdzad pa ni pha rol tu phyin pa'i lugs te/ de yang dwags po rin po ches dpal phag mo gru pa la/ 'o skol gyi phyag rgya chen po 'di'i gzhung ni bcom ldan 'das byams pas mdzad pa'i theg pa chen po rgyud bla ma'i bstan bcos 'di yin zhes gsungs shing / dpal phag mo gru pas kyang rje 'bri khung pa la de skad du gsungs pas/ rje 'bri khung pa dpon slob kyi gsung rab rnams su theg pa chen po rgyud bla ma'i bshad pa mang du 'byung ba de yin no/ 'di la chos rje sa skya pas pha rol tu phyin pa'i lugs la phyag rgya chen po'i tha snyad med cing / phyag rgya chen po'i ye shes gang yin pa de ni dbang las skyes pa'i ye shes kho na yin no zhes bzhed mod kyi/ slob dpon ye shes grags pas mdzad pa'i de kho na nyid la 'jug par/ pha rol tu phyin pa la mngon par brtson pa'i dbang po rab ni/ zhi gnas dang lhag mthong bsgoms pas so so'i skye bo'i gnas skabs nyid na phyag rgya chen po dang nges par ldan pa yang dag par rtogs pas phyir mi ldog pa'i rtags nyid dang / zhes gsungs la/ de kho na nyid bcu pa'i 'brel ba lhan cig skyes pa'i rdo rjes mdzad par yang / ngo bo pha rol tu phyin pa/ sngags dang rjes su mthun pa ming phyag rgya chen po zhes bya ba'i khyad par gsum dang ldan pa'i de bzhin nyid rtogs pa'i ye