[A:895]de mkhas pa ma mkhyen/ bkra shis rin chen gyis ni 'od mas ji ltar mkhyen pa bzhin lo bcu gnyis mnyan nas bum pa gang byo yod pa'i stengs su rwa dang 'bro dang gyi jo la sogs pa'i bka' yang gsan te/ rang las lhag pa mi 'dug gsung / de la slob dpon dus 'khor bas tshar sum cu so gnyis mnyan nas bum pa gang byo ru mkhyen no/ /de la mkhas grub bhikShu ratna shrI zhes mtshan yongs su grags pa u rgyan pas gsan/ de la bdag gis zhus pa ni brgyud pa'o/ /zhes 'byung ngo / yang brgyud pa gcig la/ slob dpon dus 'khor zhabs chen po de rnal 'byor ma cig gi bu yin pas rnal 'byor ma des khrid nas shibha lar phyin pa la/ dge slong shin tu gzugs bzang ba cig gis de la byin brlabs byas pas zhag re la sho lo ka stong stong zin pa'i blo dang ldan pa cig tu gyur nas/ de nas khye'u des byang chub sems dpa' spyan ras gzigs kyi sprul ba dge slong de la rtsa ba'i rgyud dang / bsdus pa'i rgyud dang / 'grel pa rnams mnyan nas de dag thugs la gzung nas rgya gar gyi dbus su byon no/ /byis pa de rab tu byung bas tsi lu pa zhes bya bar grags so/ /tshim bu ba zhes kyang grags so/ /de nas slob dpon tsi lu pa des ka ta ka'i rgyal po'i rtsar bzhugs pa la slob ma gsum byung ste/ de rnams kyis rgyud 'grel rnams glegs bam la bri bar zhus pas/ de dag bris nas slob ma gsum la gtad pas/ gcig paNDi tar gyur/ gcig sgrub pa por gyur/ gcig tha mal ba cig las ma byung ngo / /de