[A:909]byon nas kun spangs pa dang byang sems pa gnyis ka la dbang rgyud khrid dang bcas pa legs par gsan/ thugs dam kyang shin tu mthon por gyur nas 'gro ba mtha' dag gis 'dud pa'i gnas su gyur to/ /de'i slob mar gyur pa kun mkhyen shes rab rgyal mtshan ni/ dol po'i ban tshang zhes par sku 'khrungs/ gzhon nu la skyi ston 'jam dbyangs pa khu dpon gyi zhabs la gtugs nas bka' chen bzhi la sogs pa'i sde snod dang / rdo rje phreng ba'i dbang la sogs pa'i sngags kyi gsan pa du ma mdzad/ khyad par khu dpon gnyis la rwa lugs kyi dus gyi 'khor lo'i bshad pa legs par gsan/ sku phra mo'i dus nas sa skyar dka' bzhi'i bshad pa mdzad pas gzhan dag ma rangs pa la byang chub sems dpa'i spyod pa la 'jug pa bsnan te yang gsungs/ dbus gtsang gi grwa sa rnams su yang byon nas grwa skor mdzad pas ston pa yang bzang bar grags/ gzhan yang bla ma mang po la gsan pa rgya che bar mdzad/ de nas jo mo nang du mkhas btsun yon tan rgya mtsho ba la rgyud 'grel man ngag dang bcas pa gsan/ man ngag sku nyams su bzhes pas dpe med pa'i nyams su myong ba 'khrungs te/ dgung lo sum cu rtsa lnga la gdan sar bzhugs nas zhi bar ma gshegs kyi bar du bshad sgrub kyi bstan pa gzung / sku 'bum mthong grol chen mo bzhengs/ rang gi slob ma ma ti paN chen dang / lo tsA ba blo gros dpal gnyis la bka' gnang nas de gnyis kyis shing pho khyi la dus kyi 'khor lo'i 'gyur yang bcos/