[A:911]bca' ba la gnas pa'i sgrub pa po mang du yod par snang ngo / /de la chos rje phyogs las rnam rgyal ba ni/ 'khrungs yul mnga' ris pa me pho rta la 'khrungs/ gzhon dus nas dbus su byon nas chos 'khor gling du phar tshad la sogs pa'i mtshan nyid kyi sde snod la sbyangs pas mkhas pa chen por gyur te/ dbus gtsang gnyis kar grwa skor yang mdzad/ grwa skor gyi zhar la chos rje kun mkhyen chen po dang mjal bas shin tu dad pas jo nang nyid du phyags phab ste/ kun mkhyen chen po'i drung du dus kyi 'khor lo'i dbang rgyud bshad pa man ngag dang bcas pa dang chos gzhan yang mang du gsan/ man ngag sku nyams su bzhes pas ting nge 'dzin bzang por 'khrungs te/ bla ma la yid ches pas rang gi bla ma thams cad kyi gtso bor 'dzin/ kun mkhyen chen po'i slob ma byang ba ta'i dbon pos kun mkhyen chen po dpon slob la zhal ta zhus te ngam rings gyi chos sde btab/ der kun mkhyen chen po nyid kyis thogs shig bzhugs/ de nas phyogs las rnam rgyal pa la gtad nas jo mo nang nyid du phebs/ phyogs las rnam rgyal bas phar tshad gtso bor gyur pa'i sde snod kyi bshad pa yun ring du mdzad/ slob ma blo gsal ba yang mang du 'dus/ phyis bstan pa'i rgyal mtshan pa la gdan sa gtad nas zhe dgu pa la jo mo nang gi gdan sa mdzad/ lo lnga na gdan sa de yang gtad nas dbus su phebs/ 'tshal dbus gling du dus kyi 'khor lo'i dbang rgyud bshad man ngag gi khrid rnams slob ma'i sde chen po la gsungs/