[A:914]dus kyi 'khor lo'i dbang yongs su rdzogs pa/ rgyud 'grel chen mo'i bka'/ yan lag drug gi khrid/ dbang mdor bstan nA ro pa'i 'grel pa dang bcas pa dang / sems 'grel skor gzhan rnams kyang thos so/ /rin po che bsod bzang po'i zhal snga nas kyang chos rje phyogs las rnam rgyal ba dang mkhas pa nya dbon gnyis ka la dus 'khor yan lag dang bcas pa dang / man ngag legs par gsan nas/ khrid bshad dbang gsum yis gdul bya yun ring du bskyangs/ dbang sgrub kyi yig cha'ang mdzad/ skye bo chen po kun gyi yang bla mar gyur/ chos rje de bzhin gshegs pa dang / mthong ba don ldan gnyis kas kyang zhabs la gtugs/ mkhas shing grub pa brnyes pa'i rnal 'byor gyi dbang phyug chen po de dgu bcu rtsa gsum pa chu mo glang gi lo la zhi bar gshegs so/ /de'i slob ma dka' bcu pa pad ma bzang po bas rgyud 'grel gyi bshad pa lan mang du mdzad cing / /rgyud 'grel la TIka chen mo zhig kyang mdzad do/ /yang rin po che bsod nams bzang po'i slob ma chos rgyal chos bzang nyi mas g.ya' snang ri khrod btab/ dus 'khor gyi bshad pa dang sgrub pa gnyis kas bstan pa gzung zhing yag lag drug la rtse gcig tu byed pa'i sgrub pa po'ang mang po byung ngo / /yang kun mkhyen chen po'i slob ma 'jam dbyangs chos kyi mgon po bas g.yag sde paN chen gyi gdan sa gzung nas dus kyi 'khor lo'i bshad pa yun ring du mdzad/ 'jam dbyangs rin rgyal ba la sogs pa'i slob ma mkhas pa yang mang du