[A:920]pa'i bla ma dpal ldan seng ge bas shong 'gyur las gsan la/ rong ba shes rab seng ge ba la rwa 'gyur yang gsan/ de la kun spangs chos grags dpal bzang pos dbang dang / shong 'gyur gyi steng nas bshad pa rdzogs par gsan no/ /yang mngon gra ba rin chen rtse mo la kun mkhyen 'dzims pas gsan / de nyid dang bla ma rgwa lo gnyis ka la 'bro lugs dang rab lugs kyi skor tshang bar dbus pa dge slong tshul khrims 'bar gyis zhus la / de la dus 'khor ba ye shes rin chen gyis gsan/ de la kun mkhyen yon tan rgya mtshos gsan no/ /yang stag sde ba la mkhas pa'i dbang po dpang blo gros brtan pas gsan te/ 'di ni me pho byi ba la la stod lho'i gyam du sku 'khrungs/ yum snga mor grongs nas lug gi 'o mas gsos/ sku phra ba'i dus su chos rje byang gling pa dang grub chen u rgyan pa gnyis kyis 'di la dge ba'i bshes gnyen chen po zhig 'ong gsung nas bskyangs/ dgung lo bdun pa la mkhan chen gser khang pa'i drung du me ston 'dul 'dzin dang gnyis la rab tu byung nas 'dul ba mdo rtsa bslabs/ bcu gsum pa la bshad gsar mdzad/ de nas stag sde ba'i snyan pa gsan nas tsha snar byon te/ stag sde ba la sngags mtshan nyid kyi sde snod mang du gsan/ khyad par dus 'khor mkhas par bslabs/ bcu dgu bzhes pa'i tshe stag sde ba gshegs nas lo tsA ba mchog ldan la ka lA pa dang tsandra pa bslabs/ snyan dngags me long yang gsan/ a tsa ra 'phrad tshad la 'phral skad bslabs/