[A:944]zhes bya ba la sras lcam sring lnga 'khrungs pa'i thu bor mngal yongs su 'dzin par mdzad de/ de nyid kyi tshe na yum gyi mnal lam du gser gyi rdo rje rtsa lnga ba chu mig nas rnyed pa dang / lus sems bde bas khyab cing / nyi ma'i 'od zer gyis rtag tu 'tsho ba dang / 'ja' tshon gyis skor ba/ rol mo'i sgra snyan pa du ma grag pa sogs ngo mtshar ba'i ltas dang bcas bzhin du/ khro mo zhes bya ba shing pho 'brug gi lo'i hor zla bcu pa'i tshes nyi shu lnga la yar klungs btsan thang gi khyams khang gsar zhes bya bar bltams pa'i cho 'phrul bstan te/ phun sum tshogs pa'i 'byor pa'i khyad par gyis kyang 'phel zhing rgyas par gyur la/ dpal 'byor rgya mtsho zhes bya bar mtshan gsol te/ slad kyis gsang phu brag nag gi rin po che pa mgon rgyal bas bsod nams rgya mtsho'i sde zhes bya ba don dang mthun par mtshan gsol ba 'di nyid thams cad du grags shing / 'byor pa rgya mtsho'i dbus su bkur sti'i khyad par du mas bskyed bsrings te chu nang gi padma ltar skye bo thams cad kyi mig gi bdud rtsi lta bur gyur to/
gnyis pa gzhon nu'i spyod pa ngo mtshar ba ji ltar bstan pa'i tshul ni/ bltams ma thag pa ma ma'i pang du 'tsho ba'i dus nyid nas kun gyi yid du 'ong zhing / dad gshin pa'i kun tu spyod pas phal gyi spyod tshul las ring du song ba dang / lo bzhi lnga bzhes pa'i tshe bsam yas su phebs pa na dbu rtse rigs gsum la sogs pa'i rten rnams spyan lam du gzigs ma thag par phyag mchod kyi