[A:947]thugs 'dzin gnang bas rta chags cig gi cha la thugs su chud pa sogs/ brtson pa dang / sbyor ba dang skye bas thob pa'i shes rab phun sum tshogs pa'i mdzad pa ngo mtshar bas dus 'da' bzhin du/ dgung lo nyer gcig pa la dpal rtses thang gi tshogs su byams chos lnga/ dbu ma rigs tshogs/ rin chen phreng ba/ bshes spring / spyod 'jug dbu ma rtsa 'jug bzhi brgya pa/ mngon pa gong 'og phung po lnga'i rab byed/ mdo rtsa/ me tog phreng rgyud/ sum brgya pa/ so thar gyi mdo/ tshad ma sde bdun mdo dang bcas pa/ rigs gter rnams kyi gzhung bzhes te/ bshad pa zla ba mang po sbrel te mdzad pas/ mkhas pa thams cad mgu ba bskyed/ khyad par chos rgyal grags pa 'byung gnas pa thugs lhag par gang ste/ nged rang gis bdag rkyen byas nas re ba las lhag par blo khengs pa 'di gcig pu yin/ da ni 'dis bdag gi yongs 'dzin 'ong bar 'dug gsung nas dgyes par mdzad do/ sku'i skye ba 'di la gsang sngags kyi dkyil 'khor du dbang thog mar nod pa ni/ sku phra ba'i dus rje nyid kyi yab rig pa 'dzin pa chen pos dpal 'khor lo chen po'i dkyil 'khor du dbang bskur te/ gsang mtshan mi bskyod rdo rjer gsol/ gzhan yang gur zhal la sogs pa'i rjes gnang mang po dang / dpal dus kyi 'khor lo la sogs pa'i bka' mang du gsan no/ de nas grub mtha' dang sde ris la sogs pa'i ris su mi 'byed par bstan pa rab