[A:962]dag ni/ mkhas pa nas byis pa'i bar gyi skye dgu mtha' dag gis lam gyi dka' ba la ma 'dzems par blta zhing phyag bya ba'i 'os su gyur pa nyid de/ yi ge'i lam gyis phyogs tsam yang mtshon pa ma yin no/ /gzhan yang sbyin bdag de dag la brten nas/ dus gsum sangs rgyas kyi sku shin tu che ba dang / ston pa gnas brtan bcu drug 'khor dang bcas pa'i gser sku sogs dang / 'chims phu spyi bo'i sgrub khang gtsug lag khang rten dang bcas pa rnams dang / grwa thang la sogs pa'i zhig gsos/ bsam gtan gling gi sgrub sde chen po 'debs pa/ rje nyid kyi thugs dam bla ma bka' drin che ba rnams kyi sku dang thang ka/ rgyud sde bzhi'i lha gtso bo rnams kyi thang ka sogs dang / rgyud 'grel dang / rgyud gtso bo rnams gser dang / gzhan mdo rgyud dgongs 'grel dang bcas pa bzhengs par mdzad pa rnams ni bgrang bar mi dpyod do/ bkas bskul te lho rgyud kyi sa skyong ba dpal bkra shis dar rgyas legs pa'i rgyal pos kyang / thub chen gyi gser sku rgyab mtho nyi shu rtsa lnga yod pa/ gtsug lag khang dang bcas pa/ mchod rten chen po/ chos sde/ bka' 'gyur gser dang / bstan 'gyur shog skyar bzhengs pa dang / bsam bde nang so grags pa mtha' yas pas rgyud 'bum nas brtsams te gser gyi bka' 'gyur/ yar rgyab nang so dpon chen rin chen bzang po yab yum gyis bka' 'gyur gsar du bzhengs bzhin pa'i 'phro grub par bskul ba/ tsa ri'i gnas chen po lhag par 'khrugs te