[A:964]med/ phag mo sogs paN chen nas brgyud pa phal che ba'i sgrub dkyil/ gsang 'dus 'jig rten dbang phyug rdo rje 'jigs byed/ 'jam dpal sgyu dra/ phyag rdor dbang bskur/ rngog dkyil bdun/ zhi khro/ phur bu/ rta mgrin sogs kyi sgrub dkyil/ sbyor drug rim lnga sogs kyi khrid yig bka' bsrungs spyi/ dud sol phyi nang / gnod sbyin sogs kyi bskang gso'ang mdzad de bka' 'bum yongs rdzogs po ti bcu gnyis tsam snang ngo / /bla ma dang dkon mchog gi rten dge 'dun la zhabs tog mdzad pa'i rim pa yang / rgyu 'bras kyi theg pa 'doms par mdzad pa'i yongs su 'dzin pa de dang de dag la chos gsan pa'i dus thams cad du bsnyen bkur bstar chags dang / lhag par chos gsung dus chos ja ma chag par zhu ba/ sde snod kyi gzhung che ba rnams la gzhung rdzogs ston mo la sogs par grags pa rnams dang / dbang gsan pa'i dus dang / rgyud sde rnams la tshogs 'khor dang rgyun mchod/ gdams pa rnams la khrid ston du grags pa sogs kyang skabs de dang der chos bzang zhing kha na ma tho ba med pas mchod cing / yon gyi mchog kyang gya nom pa dang / lus ngag gi bkur bstir bya bas kyang g.yo med par mchod par mdzad la/ khyad par paN chen rin po che bod du phebs pa'i tshe gser dang na bza' la sogs pa'i 'bul ba lan cig tsam ma yin par rgya cher mdzad pa rnams lta zhog rten khebs rang yang bco brgyad tsam 'bul thub gsung /