[A:996]nas bal yul du byon/ grogs po gnyis kyang mos nas zhu zer/ de nas lo bcu dgu lon pa la bod du byon nas/ la stod kyi leng lo tsA ba'i sar mi bcu gsum la bum dbang bskur bas rta cig phul/ de nas mar byon nas gra thang du dge bshes grwa pa mngon shes la nub mo gsangs nas bde mchog lU yi pa dI bangka ra'i lugs dang / nA ro lugs gnyis gsungs pas gser srang phyed phul lo/ /'di grwa pa'i lo drug cu rtsa dgu pa yin/ lar gser srang bcu gsum rnyed nas lo zhabs de nyid la tsin tsi ling du byon/ gser srang bdun la maNDal byas nas bla ma la phul bas lo bdun na bsod nams 'ong zhes lung bstan te/ de ltar byung gsung / gser srang drug gis dbang rdzogs zhu ba'i yo byad byas nas/ de nas bla ma yab yum gyis zung 'jug gi sbyor ba la snyoms par zhugs nas gsang ba'i dbang bskur ro/ de nas bal mo 'bri snu bya ba la phyag rgya mdzad nas shes rab ye shes kyi dbang bskur/ dbang bzhi pa brngas bstan to/ /de nas snying po'i skor thams cad gsan pas rtogs pas nga rgyal lo/ /de nas rgya gar gyi grong khyer gyi mtha' na gsang spyod pa yod pa'i rtsar btang bas phyin pa dang / mchod khang cig na thang ka cig bkram/ de'i mdun na mchod pa lnga bshams nas 'dug der bsdad bas dge slong gi cha byad 'dzin pa cig lhung bzed dang gsil byed thogs nas grong khyer nas bsod snyoms bslangs te byon nas/ khyod rnal 'byor pa mda' gzhu 'dzin pa'i slob ma yin te 'ong gsung