[A:༢༦ན]གཙོ་བོར་སྦྱར་བ་ལས། འདིར་མན་ངག་གི་སྐོར་དང་། རྒྱུད་གཉིས་ཀ་འཆད་པའི་ཚུལ་ལ། དཔལ་ལྡན་ས་སྐྱ་པའི་བསྟན་འཛིན་སྔགས་ཀྱི་རྒྱལ་ཚབ་ཆེན་པོ་ངོར་རྫོང་གཉིས་ལ་མི་མཐུན་པ་མང་མོད། ངོར་ཆེན་རྡོ་རྗེ་འཆང་གི་ཕྲིན་ལས་སྐྱོང་བ་ཚོགས་སློབ་ཀྱི་བརྒྱུད་འཛིན་དམ་པ་རྣམས་བཞེད་པ་མཐུན་པར། སྔོན་འགྲོའི་ཁྲིད་སྣང་གསུམ་རྫོགས་ནས་རྒྱུ་དབང་གིས་སྨིན་པ་དང་། དངོས་གཞི་རྒྱུད་གསུམ་གྱིས་དཀྲི་བའི་སྐབས་ལམ་དབང་། བྱིན་རླབས་སྐོར། རྣམ་བཤད་རིགས་སྐབས་སུ་གང་བབ་སྦྱར་ཞིང། ཁོག་དབུགས་དང་རྣམ་ཐར་སྐོར་གྱི་ལུང་ཐུན་མོང་བ་རྣམས་སྔོན་འགྲོའི་སྐབས་དང་། གཞུང་བཤད་དང་པོད་དམར་སེར་སོགས་ལུང་ཐུན་མིན་ཕལ་ཆེར་དངོས་གཞིའི་སྐབས་སུ་མཛད་པའི་ཕྱག་ལེན་རྣམ་དག་འདི་དེང་སང་གི་བར་དུ་དར་བའོ། །
གཉིས་པ་ལ་མ་སྨིན་པ་སྨིན་པར་བྱེད་པའི་དབང་བསྐུར་བ། སྨིན་ཟིན་གོམས་པར་བྱེད་པའི་ཐབས་འཁྲིད་སྟོན་པ། སྨིན་གྲོལ་བརྟན་བྱེད་བྱིན་རླབས་ཀྱི་སྐོར། མན་ངག་གི་གནད་ལ་ཐོས་བསམ་གྱིས་སྒྲོ་འདོགས་གཅོད་པ་དང་། ཡིད་ཆེས་པའི་ཕྱིར་བསྟན་བཅོས་རྡོ་རྗེའི་ཚིག་རྐང་