[A:༢༠༥]བར་མཛད་པའང་དོན་ལའང་དེ་བཞིན་བྱུང་གསུང་ངོ༌།།
དགུང་གྲངས་སོ་ལྔ་ཕེབས་པ་ཆུ་ལུག་རྒྱལ་པོ་ལོ་གསར་ཉིན་གོང་གི་དཔོན་ལ་ཚེ་དཔག་མེད་ལྷ་དགུའི་དབང་དང༌། གསོལ་སྨན། མགུལ་བསྲུང༌། རྡོ་སྐུའི་ཁ་སར་པ་ཎི་ཁྱད་མཚར། རྗེ་ཉིད་ཀྱི་རྒྱུན་བཞེས་ཞལ་དཀར་འབྲས་སིལ་གྱིས་གང་བ་སོགས་བསྩལ་ནས་ནང་སྦྱར་བཀའ་མཆིད་ཚང་མ་སྙན་དུ་ལྷོང་ངེས་དང༌། ཚོམས་ཆེན་དུ་བླ་བྲེ་ཡོལ་བ་སོགས་གཟབ་མས་མཛེས་ཤིང༌། གོ་བབས་དང་བསྟུན་པའི་བཞུགས་སྟན་སྡེར་ཁ་སོགས་ཀྱི་ཐོག་ལེགས་བཤད་རིགས་ལུང་གི་བགྲོ་གླེང་བཅས་གྲ་འགྲིག་མཛད་མཐར་དཔོན་ཡབ་སྲས་འཁོར་བཅས་ཀྱིས་རྗེ་ཉིད་ལ་མགུལ་དར་སྒྲོན་པ་དང་བསྟུན། སྐྱབས་འཇུག་གི་རྗེས་འཛིན་ཞུ་བ་དང༌། གང་ཅིའི་ལེགས་ལམ་མཚམས་ལ་ལྷ་མི་ངོ་འཕྲོད་ལྟ་བུའི་འཕྲོས་ཡོང་ཚུལ་ཞུས་ཤིང༌། རྗེ་རྡོ་རྗེ་འཆང་ནས་ཀྱང་ལུགས་ཟུང་གི་ཞལ་ཏ་མཐའ་འདོམས་བཅས་གནང་བས། ཁོང་ཐུགས་འཕྲེང་བས་འབྲལ་མི་ཕོད་པ་ལྟ་བུའི་སྤྱན་ཆབ་དང༌། ཐུགས་སྨོན་ཡང་དག་མཛད་པ་དང༌། མཉམ་དུ་སྲས་ཆུང་ངུ་དེས་ཀྱང་སྐུ་མདུན་གྱི་གསོལ་ལྕོག་བརྐོས་མ་ནས་བཟུང་སྟེ། སྨོན་ལམ་མཛད་པ་སོགས་ཡབ་སྲས་གཉིས་ཀ་ཐུགས་ཚིམ་པའི་གོ་འཕང་ལ་འགོད་པར་མཛད་དོ། །དེ་དུས་འདི་ཕྱོགས་ཁ་ཏར། ད་ལོ་དཔོན་ཁག་སྟོབས་ཆེན་སྲས་བཙུན་མོ་བཅས་ཤིས་པར་ཕེབས་ཤིང༌། མདོས་ཆེན་ལོ་གསར་བཅས་གཟབ་ལུགས་འདིའི་སང་ལོ་འུ་བུ་ཅག་ལ་མདོས་ཆེན་གཟབ་སྤྲས་བྱེད་རྒྱུ་ཡོང་ཟེར་བའང་དོན་ལ་གནས། དེ་ནས་