[A:60]pa gsan skabs byon/ chos 'phro sogs yong ba bgyid sogs kyi bslab ston dang/ mar phyogs kyi sde pa so sor yang 'bul sdud la phan pa'i bka' shog lam yig stsal zhes/ 'di dag chu 'dus pa dbang phyug gi ngag las dngos kyis thos so//
gsang sngags rab 'byams slob mkhas gong ma'i mdun//
ji bzhin mkhas par bslabs khyod khengs min la//
rang blo yig ngor drangs pa'i mkhas 'dod can//
smra brjod mkhan de glu mkhan gzhogs 'phya'i tshul//
rong ston bstan pa'i nyi ma nub kyi spor//
mdzad pa'i rjes mthar yongs su nub nas slar//
khyod sku dge mtshan bya ba'i 'od dkris can//
legs smon shar gyi ri rtser lhang nger gsal//
rig 'dzin 'chi med mchog brnyes grub pa'i rje//
drang srong bgres po'i spyan sngar rgan po'i ngag//
phyis 'byung byis pa'i bla brjod ma 'dres pa'i//
sngon rabs chos kyi ro bcud tshim par bzhes//
tshul gnas dri bsung 'phro ba'i mkhan po mchog//
zhi dul sbyangs pa'i gnas brtan dam pa'i drung//
ji skad bshad pa'i las grwa dpe bral las//
gang khyod bsnyen par rdzogs zhes gtam du gleng//
'dul ba rgya mtsho'i pha rol mthar phyin zhing//
gnang bkag khrims brgya'i nges gnas nor bu'i mdzod//
'dul 'dzin 'bum sde'i ded dpon zla bral khyod//
gsol bzhi'i las kyi sgyu thabs len 'di mtshar//
rang bzhin khrims kyi lus gtsang dri ma med//
bag yod shes bzhin gos mchog 'dzin pa can//
mkhas slob las kyi cho ga'i mig 'phrul la//
ci nas brten 'di dam chos sgyu ma'i gar//
zhes paNDi ta chen po shAkya mchog ldan dri med legs pa'i blo gros kyi rnam par thar pa zhib mo rnam par 'byed pa las/ bsnyen par rdzogs pa'i skabs las bsgrags