[A:382]ste/ rje btsun 'jam pa'i dbyangs so//
de yis kyang//
shambha lar grags shAkya yi//
rin chen brtsegs pa'i khang bzangs su//
dbang bskur rig 'dzin brnyes pa zhig//
dpal ldan sa yi khyon 'dir 'khrungs//
zhes smras te/ 'jam dpal dbyangs des kyang/ kai la sha'i ri'i rtse mor rin chen sna tshogs las grub pa'i gzhal yas khang/ shambha la zhes rnam par grags pa shAkya rnams kyis yongs su bzung ba'i rig pa 'dzin pa'i grong khyer chen po'i dbus su nyi ma'i shing rta la sogs pa'i drang srong bye ba phrag phyed dang bzhi dbang bskur zhing/ grol bar mdzad pa las/ de'i nang nas rig pa 'dzin pa brnyes pa'i grub pa'i dbang po zhig/ gangs ri'i phreng bas bskor ba'i yul ljongs 'dir bsams bzhin du skye ba bzhes pa ni kun mkhyen rin chen shAkya zhes mtshan yongs su grags pa de nyid yin no//
de la yon tan gyi khyad par ci zhig mnga' zhe na/ smras pa/
dri zhim gyis bsgos pad mo'i mtshor//
bung ba'i tshogs bzhin de la yang//
rdo rje 'chang dbang bka' grub pa'i//
rig pa 'dzin pa kun gyis so//
zhes smras te// bung ba dga' bar byed pa'i dri zhim gyis phyogs kun tu khyab pa'i pad mo'i tshal du bung ba'i tshogs rnams ngang gis 'du ba bzhin du/ yi dam gyi lha dang/ rdo rje 'chang chen po'i gsung gi mdzod la dbang bsgyur ba'i rig pa 'dzin pa'i tshogs dpag tu med pas dngos su byin gyis brlabs pa ni bsam gyis mi khyab la/ de las kyang khyad par du dpal sha wa ri dbang phyug gis bal bod kyi mtshams su sprul pa'i dkyil 'khor chen po mngon par sprul nas dbang bskur zhing/ so sor sdud pa dang bsam gtan la sogs pa'i rnal 'byor yan lag drug gi gdams pa yongs su rdzogs par mnos nas dben zhing