[B:56a]ya tshal rlung gi bskyod pa bzhin/ /
'chi med lha yi sil snyan sna tshogs pa/ /
sngar med sgra ni yun du grag par gyur/ /
skabs gsum mdzes ma'i lag par gser gdub dag /
rin chen rdul brtsegs dga' ma'i phrag pa nas/ /
gangs ri du gU la yi stod g.yogs kyi/ /
'ching ba grol nas thur du lhung ba dag /
nor 'dzin yangs pa'i pang du 'khyil ba bzhin/ /
'jig rten rgyan de zhing gzhan gshegs pa na/ /
rgya mtsho'i gos can ma 'di mya ngan gyis/ /
dga' ba'i yid 'khrugs g.yo zhing 'dar ba ni/ /
rgya mtsho'i klong gi gru gzings ji bzhin no/ /
der ni dad ldan 'ga' zhig 'dren byed las/ /
mchi ma'i chu klung mi zad 'bebs bzhin du/ /
shugs rings gdung ba'i dbugs kyis mgrin pa dag /
rab tu 'gags pa'i 'dzer 'dzer cho nge 'don/ /
kha cig rtsa ba bcad pa'i ljon shing ltar/ /
mnyam pa'i sa la'ang lan brgyar 'gyel zhing 'dre/ /
gzhan dag dran nyams mi g.yo sems bral bzhin/ /
[A:187]phal cher mya ngan mun pa'i mal nang bcug /
dam pa'i mgon dang bral ba'i sdug bsngal gyi/ /
rims nad drag pos bde ba'i go skabs bral/ /
bdag cag gdul bya'i tha shal skal dman la/ /
brtse chen khyod kyi brtse ba'ang ming du bas/ /
bdag gi yab gcig brtse med lha rnams kyi/ /
dbang pos dag pa'i zhing du spyan 'dren slad/ /
lha yi dga' ston bstar ba'i cho ga 'di/ /
ngo mtshar gyur mod ci slad byung bsams na/ /
bdag cag snying la mi zad mya ngan rgyu/ /
lha yi me tog gnyen zhing 'jam pa yang / /
dad ldan lus la tsher ma bas kyang rtsub/ /
tshangs pa'i rgyud mang ltar snyan rol mo'i sgra/ /
rna ba gtser la rno ba'i thur ma bzhin/ /
tsan dan sbrul gyi snying po'i dri bsung yang / /
snying la gdung ba'i me lce 'bar ba'i grogs/ /
rma bya'i gdugs ltar bkra ba'i brgya byin gzhu/ /
mthong bas bdag gis mig gi dug tu