[B:3a]spyod par mdzad pa las/ snyigs ma lnga'i rang bzhin can rtsod pa'i dus kyi sems can rnams lhag por thugs rje'i spyan ras kyis btsa' zhing / thabs mkhas pa'i phyag gis drang bar mdzad pa po ston pa gzhan las snying stobs phul du byung ba ni mnyam med shAkya thub pa zhes grags pa'i ston pa mchog 'di yin la/ ston pa 'dis 'dzam bu'i sgras mtshan pa'i zhing 'dir mdzad pa bcu gnyis la sogs pa rnam par rol pa'i bkod pa rgya chen pos gdul bya rnams kyi [A:5]don mdzad nas/ bstan pa rin po che phan bde'i gzhir gyur pa 'dzin pa'i skyes bu dam pa rnams dang / bstan pa'i gnas tshad dang / bstan pa byang phyogs nas byang phyogs su dar bar lung bstan pa'i dbang gis/ gangs ris bskor ba'i ljongs 'di nyid 'phags pa phyag na padmo can la sogs pa'i khyad par gyi gdul bya'i 'os su gyur pas/ bod khams chos kyi mnga' ris chen pos bskyang ba'i phyir/ sa chen po skyong ba'i rgyal rigs shing sA la lta bu rim par byon nas/ zhi ba btsan po'i phrin las kyis mnga' 'bangs su phab ste/ de nas rim gyis dam pa'i chos kyi srol chen po la 'dzud par mdzad pas/ bod mtha' 'khob tu grags pa 'di dag 'phags yul las kyang bla lhag pa'i bstan pa rin po che la dbang 'byor ba yin zhing / de bas na spyir sangs rgyas kyi bstan pa rin po che ris med pa dang / khyad par bod khams rgya hor dang bcas pa'i zhing khams su zab pa dang rgya che ba'i chos kyi rnga bo che brdungs pas/ gdul bya bsam gyis mi khyab pa dag las dang nyon mongs pa'i gnyid 'thug po las sad par mdzad nas/ tshul gsum gyi