[A:220]རྟ་ལུག་གསུམ་རྒྱས། །དགའ་སྐྱིད་དེ་ལྟར་ཡོད། །ཨེ་མ་ངོ་མཚར་ཆེ། །ལྷ་གཅིག་ཀོང་ཇོ་གསོན། །ཞེས་གླུ་བླངས་པས། ལྷ་གཅིག་གི་བསམ་པ་ལ། དེ་ལྟར་བདེན་ན་ང་རང་གི་ཡུལ་དང་འདྲ་བར་འདུག་བསམས་ནས། མཆི་མ་ཕྱིས་ཏེ། བློན་པོའི་ཕྱིར་འབྲངས་སོ། །བློན་པོས་རྟ་ལ་བསྐྱོན་ཏེ། ཁྲོམ་བསྐོར་ནས། རྒྱ་ཧོར་གཉིས་ལས་ལྷག་པ་ངེད་བོད་ཡིན། ལྷ་གཅིག་ངེད་ཀྱིས་སྤྱན་འདྲེན་པ་ཡིན་པས། ཐམས་ཅད་ཁར་མཛུབ་མོ་ཆུག་ལ་སྡོད་བྱས་སོ། །དེར་རྒྱ་ནག་གི་མི་རྣམས་ཀྱིས་སྨྲེ་སྔགས་བཏོན་ཏེ། ངེད་ཀྱི་ལྷ་གཅིག་མཛངས་མ་དེ། བོད་ངན་པས་ཁྱེར་ཟེར་རོ། ། དེར་རྒྱལ་པོའི་ཞལ་ནས་བློན་པོ་གཞན་རྣམས་ལའང༌། ཁྱེད་རྣམས་ཀྱང་ངེད་རྒྱ་ནག་པའི་གཉེན་ཟླ་ཡིན་པས། ཁྱེད་རང་ཚོས་འདོམས་པའི་བུ་མོ་རྣམས་ཁྲིད་ལ། སོ་སོའི་ཡུལ་ལ་སོང་ཤིག་གསུང་ངོ༌། །དེར་བློན་པོ་མགར་གྱིས་ལྷ་གཅིག་ལ། ད་ནི་བོད་དུ་འགྲོ་ཐབས་གྱིས་ཤིག་བྱས་ནས་བཏང་ངོ༌། །དེར་ལྷ་གཅིག་གིས་ཕོ་བྲང་དུ་ཕྱིན་པས། ཡབ་རྒྱལ་པོའི་ཞལ་ནས། ཁྱོད་བོད་ཀྱི་རྒྱལ་པོའི་བཙུན་མོར་འགྲོ་དགོས་གསུངས་པས། ལྷ་གཅིག་ན་རེ། ཆོས་མེད་པ། ཡུལ་ངན་པ། ཕ་མིང་དང་མི་འཕྲད་པའི་ས་ཐག་རིང་བ་དེར་ང་མི་འགྲོ་ཟེར། ཡབ་ཀྱི་ཞལ་ནས། ཁྱོད་དེ་སྐད་མ་ཟེར་འགྲོ་དགོས། བོད་ཀྱི་རྒྱལ་པོ་དེ་མངོན་ཤེས་རྫུ་འཕྲུལ་མཐུ་སྟོབས་དང་ལྡན་པ་གཅིག་ཡོད་པར་འདུག ངས་ཇི་སྐད་སྨྲས་ཀྱང༌། ཁོས་བོད་ཡུལ་དུ་མ་ཕྱིན་པར། ལན་ཡི་གེའི་ནང་དུ་འོང་གིན་འདུག་ཁྱོད་མི་འགྲོ་བ་ཁོང་གིས་ཤེས་ནས། དམག་ཁྲི་ཕྲག་ལྔ་ཙམ་འདིར་བྱུང་ནས། ང་བསད། ཁྱོད་ཁྱེར། ཡུལ་མཁར་ཐམས་ཅད་བཅོམ་ན་ཇི་ཚུག་བྱེད། བློན་པོ་དེའི་བྱེད་ལུགས་ལ་ལྟོས་དང༌། དེ་བས་ཕྱིན་པ་ལེགས་སོ་གསུངས་པས། དེར་ལྷ་གཅིག་གིས་ཡབ་ལ་ཕྱག་འཚལ་ཏེ་