[A:212]བཟང་བ་ལ་དགའ་བས། ཧོར་ལ་སྟེར་ཟེར་རོ། །ལྷ་གཅིག་རང་སྐྱེ་གཟུགས་ལེགས་པ་ལ་དགའ་བས། མི་ཚེ་ཧྲིལ་པོར་འགྲོགས་པའི་རྟེན་གྲོགས་གལ་ཆེ་ཟེར་ནས། གེ་སར་དམག་གི་རྒྱལ་པོ་ལ་མོས་པ་བྱུང་ངོ༌། །དེར་བོད་ལ་དགའ་བ་གཅིག་ཀྱང་མ་བྱུང་ངོ༌། །དེར་རྒྱལ་པོའི་ཞལ་ནས། ཁྱེད་གཉེ་བོ་རྣམས་ལ་ཉེ་རིང་མེད། རིག་པ་གང་རྣོ་བ་ཞིག་ལ་སྟེར་བས། རིག་པ་འགྲན་ཟེར་རོ། །རྒྱལ་པོ་དེའི་བླ་གཡུ་བཞག་སྒོར་མོ་བྱ་བ། ཆེ་ཆུང་ནི་ཕུབ་ཆུང་ཚད་ཙམ་པ། བཀྲག་ཆེ་བ། མིག་གཅིག་མཐའ་ན་ཡོད་པ། མིག་གཅིག་དཀྱིལ་ན་ཡོད་པ། ནང་གི་མིག་ཀྱང་ཕུག་གི་སྤ་རིམ་ལྟ་བུར་ཡོད་པ་དེ་དང༌། དར་ཡུག་གཅིག་བློན་པོ་ཚན་ལྔ་པོ་ལ་གཏད་ནས། གཡུ་འདིའི་མིག་ཏུ་དར་ཡུག་འདི་སུས་ཚུད་པ་ལ། ལྷ་གཅིག་སྟེར་ཟེར་རོ། །དེར་བློན་པོ་གཞན་རྣམས་དབང་ཆེ་བས། སྔོན་ལ་ཁོང་ཚོས་གཡུ་ཁྱེར་ཏེ༑ ཐབས་སྣ་ཚོགས་བྱས་ནས། ཉི་མ་མང་པོ་ལག་འགྲིམ་གྱིས་བརྒྱུས་པས། སུས་ཀྱང་མ་ཚུད་ནས། བློན་པོ་མགར་ལ་གཏད་དེ། ངེད་རྣམས་ཀྱིས་ནུ་ཇི་ལྟར་བྱས་ཀྱང་མ་ཚུད། ཁྱེད་རང་ཨེ་ཚུད་ལྟོས་ཤིག་ཟེར་ནས། གཡུ་དར་ཡུག་དང་བཅས་པ་གཏད་དོ། །དེར་མགར་རིག་པ་ཅན་དེས། སྔར་ནས་རྒྱའི་གྲོག་མ་གཅིག་ཟན་དང་འོ་མས་གསོས་ཏེ། མཐེབ་མོ་ཙམ་དུ་སོང་བ་དང༌། དེའི་སྐེད་པ་ལ་དར་སྐུད་བཏགས་ཏེ། དར་ཡུག་གི་སྤྱི་བོ་བསྡུས་ནས་བཙིམ་སྟེ། གྲོག་མ་དེ་གཡུ་མིག་ཏུ་བཙུད་དོ། །དར་གཡུ་དེ་ལག་ཏུ་བླངས་ནས་ཕུ་བཏབ་པས། རླུང་གིས་དེད་ནས། མཐའི་མིག་ཏུ་ཐོན་བྱུང་ངོ༌། །དེ་ནས་གྲོག་མའི་རྐེད་པ་ནས་དར་སྐུད་དཀྲོལ་ཏེ། ནུར་གྱིས་འཐེན་པས། གཡུ་མིག་ཏུ་དར་ཡུག་ཚུད་དོ། །ངེད་ཀྱིས་འདི་བཞིན་བྱུང་ཡོད་པས། ལྷ་གཅིག་ཞུ་བྱས་པས། ད་རུང་རིག་པ་འགྲན་ནོ་ཟེར་