[A:215] དེར་བློན་པོས་རྔ་དེ་ལ་སྐྱོན་ཅན་དུ་གོ་ནས་བློན་པོ་རྣམས་ཁྲིད། སྒོ་རེ་རེ་བཞིན་འདྲེན་གིན། སྒོ་ལ་རམས་དང་ཚོས་ཀྱི་ཁུ་བས་མཚན་མ་འདེབས་གིན་ཕོ་བྲང་དུ་ཕྱིན་ནོ། །ཕོ་བྲང་ན་བློན་པོ་གཞན་རྣམས་འཚོགས་འདུག་གོ །དེར་རྒྱལ་པོས། དོ་དགོང་བློན་པོ་ཐམས་ཅད་ལ་སྟོན་མོ་ཞིག་བྱས་ནས། སྲོད་ཀྱི་མུན་ནག་ལ། རྒྱལ་པོའི་ཞལ་ནས། ཁྱེད་རང་བློན་པོ་ཐམས་ཅད་ཕྱིར་སོང་ལ། རང་རང་གི་ཁང་པ་རྙེད་པ་གྱིས་ཤིག དེ་སུས་རྙེད་པ་ལ་བུ་མོ་སྟེར་གསུངས་སོ། །དེར་མགར་གྱིས་ཕོ་བྲང་ནས་མར་མེ་གཡར་ཏེ། སྒོ་རེ་རེ་བཞིན་འདེན་གིན། སྔར་གྱི་མཚན་མ་རྣམས་བལྟས་ཕྱིན་པས། རང་གི་ཁང་པ་རྙེད་དོ། །སང་ནམ་ལངས་པ་དང༌། བློན་པོ་གཞན་རྣམས་བལྟར་ཕྱིན་པས། ལ་ལ་གཞན་གྱི་ཁྱིམ་དུ་ཚུད། ལ་ལས་སྒོ་མ་རྙེད་ནས་རྒྱ་སྲང་ན་ཉལ་འདུག་གོ །ཡང་མགར་གྱིས་ངེད་ཀྱི་ཁང་པ་རྙེད། གཞན་རྣམས་ཀྱིས་མི་རྙེད་པར་འདུག ལྷ་གཅིག་ཞུའོ་བྱས་པས། རྒྱལ་པོའི་ཞལ་ནས་ད་ནི་ཞག་གསུམ་གྱི་ཉིན་ཤར་སྒོའི་ཐང་ལ། བུ་མོ་མཚར་སྡུག་དང་ལྡན་པ་སུམ་བརྒྱ་རྒྱན་གྱིས་བརྒྱན་ནས་གྲལ་བྱེད། དེའི་ཁྲོད་དུ་ལྷ་གཅིག་འཇོག་པས། དེ་ངོ་སུས་ཤེས་པ་ལ་བསྐུར་བ་ཡིན་གསུངས་སོ། །དེ་ནས་མགར་གྱིས་གནས་མོ་དེ་དང་ལུས་འབྲེལ་ཤིང་མཐུན་པར་བྱས། ཟས་ཆང་གིས་མགོ་བསྐོར་ཏེ་དགའ་བའི་གཏམ་སྨྲས་ནས། ངེད་བློན་པོ་རྣམས་ཀྱིས་རྒྱ་ནག་ཏུ་སླེབ་ནས་ལོ་གཅིག་འགྲོ། རིག་པ་དེ་ངེད་རྣོ། ལྷ་གཅིག་འདི་ངེད་ཀྱིས་ཐོབ་པ་ལ་བརྙས་པ་བྱས་མ་བྱིན། ལྷ་གཅིག་འཕྲུལ་གྱི་ཀོང་ཇོ་འདི་མ་མཐོང་བ་ལ་སྒྲ་ཆེ་བ་གཡུ་འབྲུག་སྔོན་མོ་དང་འདྲ་བ་ཞིག་འདུག ལྷ་གཅིག་དེ་དང་ཁྱོད་གཉིས་ཤིན་ཏུ་མཐུན་པར་ཡོད་འདུག་པས། ཁྱོད་ཀྱིས་ཅི་འདྲ་ཞིག་ལེགས་པར་སྟོན་དགོས། ད་ནི་ཤིན་ཏུ་གལ་ཆེ་བར་ཡོད་དོ།།