[A:276]mthong ba'i yul med kyis/ /ma bltas bzhag pas chos nyid mthong / /ma bsgrub bzhag pas sems nyid grub/ /ma bzung ma glod rang sar grol/ /de ltar mthong ba'i gang zag la/ /'khor 'das gnyis su ngas ma mthong / /dge sdig gnyis su ngas ma mthong / /bzang ngan gnyis su ngas ma mthong / /rtag chad gnyis su ngas ma mthong / /pho mo gnyis su ngas ma mthong / /bde sdug gnyis su ngas ma mthong // yin min gnyis su ngas ma mthong / /nye ring gnyis su ngas ma mthong / /mtho dman gnyis su ngas ma mthong / /gsal 'grib gnyis su ngas ma mthong / / mthong ba med pa'i rang nyid nas/ /sna tshogs shar ba rang nyid yin/ /sna tshogs 'gag pa med par zhog /sna tshogs 'dzin pa med par zhog /sna tshogs spang blang med par zhog /sna tshogs 'dzin bral chos sku yin/ /ma 'gags gsal ba longs sku yin/ /sna tshogs bral ba sprul sku yin/ /tha mal rtog med chos sku yin// chos nyid 'dod pa tha mal yin/ /blo las 'das pa de nyid yin/ /'dod pa bral na don dang bral/ /gnyis 'dzin grol na gnas su rtogs/ /spang blang med na dngos grub thob/ /'gro don byed na phrin las rdzogs/ /blo thag chod na 'gro sar phyin/ /phyin pa med na brdol ba yin/ /de lta bu yi gang zag la/ /rig pa thams cad rang rig yin/ /shes pa thams cad rang shes yin/ /grol ba thams cad rang grol yin/ /gsal ba thams cad rang gsal yin/ /stong pa thams cad rang stong yin/ /'dug pa thams cad rang 'dug yin/ /gnas pa thams cad rang gnas yin/ /bde ba thams cad rang bde yin/ /sdug bsngal thams cad rang sdug yin/ /thams cad rang rig rang snang yin/ /sgom du med pas bsam