[A:315]klu gong gis/ /lcags sprel gdong drug bya ba blangs/ /gtso bo rnams kyis glu blangs pa/ /ya mtshan gser gyi me tog blangs/ /stag shar rnams kyis glu blangs pa| |stag ru dgu brtsegs bya ba blangs/ /mo btsun rnams kyis glu blangs pa/ / me tog phreng ba bya ba blangs/ /sman shar rnams kyis glu blangs pa/ /grong zer ring mo bya ba blangs/ /gzhan yang brjod kyis mi long ste/ /lo skor gcig gi bar du ni| |mi res glu re blangs pa yin/ /skyid pa'i dus su dpal gyi 'dom brkyang ste/ / dga' bde skyid pa'i dpal la longs spyad de/ /phan bde nyi zla'i 'od lta bur/ / lo skor gcig gi bar du phyogs thams cad du khyab par mdzad do/ /de nas rgyal po'i zhal nas/ tshe 'dir thar pa byang chub don du gnyer 'dod pas/ tshe 'di'i bde skyid 'dis kyang nges par bslus gsungs te/ sangs rgyas kyi bstan pa dar zhing rgyas par bzhed nas/ rgya gar gyi yul nas paNDi ta bi ma la mi tra la sogs pa'i mkhas pa mang po spyan drangs/ sgra bsgyur gyi lo tsA ba bai ro tsa na dang / kha che A nanda dang / 'dan ma rtse mangs dang / gnyags ku mA ra dang / rma a tsArya rin chen mchog dang / 'khon klu'i dbang po/ ka ba dpal brtsegs/ cog ro klu'i rgyal mtshan dang / zhang sna nam ye shes sde la sogs pas lo tsA byas te/ sgra bsgyur rgya gar gling du gzhi bzung nas/ sde snod gsum ka bod du bsgyur/
lo tsA ba snga tshar gsum/ bar tshar gsum/ phyi tshar gsum ste yongs su grags pa lo tsA ba dgu/
dge 'dun gyi sde btsugs/ sangs rgyas kyi bstan pa nyi ma shar ba lta bur dar zhing rgyas par mdzad do/ /de nas bod 'bangs thams cad dge ba bcu'i khrims la gnas te/ bde skyid dang ldan par gyur to/ /de nas mkhan po bo dhi sa twa'i zhal nas/ slob