[A:316]dpon padma 'byung gnas kyis brtan ma bcu gnyis dam la btags pas/ bod du mu stegs pa mi 'ong gis/ ma 'ongs pa'i dus su nang pa dang lta ba mi mthun pa'i dus shig 'ong / de'i dus su nga'i slob ma ka ma la shI la bya ba yod kyis de gdan drongs shig des lta ba phyogs gcig tu mthun par 'gyur ro zhes gsungs te/ mya ngan las 'das so/ /de nas rgyal pos chos kyi ring lugs ye shes dbang po la bskos/ de nas mkhan pos ji ltar gsung ba bzhin/ rgya nag gi yul nas ha shang ma hA ya na bya ba bod du byon nas/ dbu ma'i lta ba la ston min pa bya ba dang / tsen min pa bya ba gnyis su byung nas/ nang pa dang lta ba ma mthun par rtsod pa byed do/ /de'i tshe mkhan po'i zhal chems bzhin/ ye shes dbang pos mkhas pa ka ma la shI la gdan drangs te bod du byon/ bsam yas kyi thad ka'i pha ri'i chu 'gram du phebs pa dang / ha shang na re/ bdag gis kyang paNDi ta byon pa la bsu ba byed do gsungs te tshu ri'i chu 'gram du byon no/ /der ha shang byon pa ka ma la shI las gzigs te/ ka ma la shI la'i thugs la ha shang 'di rigs pa dang ldan na bdag gis nges par thul gyis rigs pa dang mi ldan na mi thul dgongs te/ ha shang gi rigs pa brtag pa'i phyir du/ khams gsum 'khor bar 'khyam pa'i rgyu ni gang yin zhes 'dri ba'i brda ston pa'i phyir du/ ka ma la shI las khong rang gi dbu la phyag shing lan gsum bskor bas/ de ha shang gis gzigs te/ 'khor bar 'khyam pa'i rgyu gzung 'dzin gnyis las byung zhes lan 'debs pa'i phyir du/ ber gyi thu ba nas bzung ste/ lan gnyis sa la brdab pas/ ka ma la shI la'i thugs la ha shang rigs pa dang ldan pa zhig 'dug pas/