[A:180]pas/ blon po dbang po rno ba bdun rgya gar du yi ge slob tu btang pas/ mtha' 'dre rnam pa gsum la thug nas log pas/ de nas thon mi a nu'i bu/ thon mi sambho Ta zhes pa yid gzhungs pa dbang po rno ba/ yon tan du ma dang ldan pa zhig yod pa la/ gser mang po bskur nas rgya gar du yi ge slob tu btang ngo / /der blon pos rgya gar lho phyogs su phyin te/ yi ge'i sgra la mkhas pa bram ze li byin zhes bya ba yod zer ba thos nas/ bram ze ga la ba der phyin te/ gus par phyag btsal te gsol ba/ thugs rje rab rgyas rnam 'phrul lha yi rigs/ /yon tan ldan pas bram ze'i rigs su 'khrungs/ /tshe sngon yon tan sbyangs pa song ba'i mthus/ /lung rigs yi ge'i sgra la phul du phyin/ /mkhas grub rig 'dzin bram ze chen po khyed/ /cung zad bdag la dgongs shing gsan du gsol/ /bdag ni mtha' 'khob bod kyi blon po yin/ /bdag gi rgyal po thugs rje chen po lags/ / bcu gsum lon nas rgyal sa rab bzung ste/ /rin chen khri yi steng du bzhugs pa'i dus/ /'khor 'bangs rnams la chos kyis tshim pa dang / /dge ba bcu yi rgyal khrims bca' ba la/ /bdag gi yul na yi ge'i srol med pas/ /bdag la phyag rten rgya chen bskur nas ni/ khyed kyi yul du yi ge slob tu btang / /mkhas pa khyed kyis sgra tshad yi ge'i tshogs/ /ma lus bdag la gnang bar mdzad du gsol/ /zhes zhus nas/ gser rnams phyag tu phul ba dang / bram ze chen po des/ gser phyag tu bzhes nas lan mdzad pa/ legs par nyon cig skal ldan rigs kyi bu/ /thon mi zer ba'i blon po rig pa can/ /bden gnyis don rtogs blon chen khyed la ni/ /yi ge'i sgra dang snyan ngag la sogs dang / /gzhan yang