[A:193] slar sdong po de la thim pa dang / dal bus chod cig bya ba'i sgra byung ngo / /der sdong po de tshal pa bzhir gshags pa'i nang na/ 'phags pa spyan ras gzigs yid bzhin gyi nor bu zhal bcu pa/ zhi zhal gsum/ khro zhal bdun/ zhi rgyas dbang drag gi phrin las 'grub pa/ de'i steng na a mi dhe ba bzhugs pa/ rtsa phyag bcu po phyag mtshan dang bcas pa/ 'od dang 'od zer phyogs bcur 'phro ba zhig byon no// tsandan de la tshal pa brgya rtsa brgyad byas/ sku brgya rtsa brgyad bzhengs te/ lha khang brgya rtsa brgyad du bzhugs so/ /de nas yang tsandan gor shi Sha len pa la/ dus skabs dang bstun te glang rdzis bstan nas gor shi Sha blangs/ snga ma ltar byas so// de nas dge slong gis mchod rten padma'i bum pa'i nang nas/ sangs rgyas rabs bdun gyi ring bsrel bre gang bsnams nas slar rgyas btab bo/ /de nas rgya mtsho'i gling la byon pa dang / 'jag ma re re'i steng na/ sangs rgyas re bzhugs par gzigs nas/ 'jag ma phon cig kyang bsnams so/ /de nas chu bo nai rAnydza ra'i 'gram du byon pa dang / bye ma 'bru re'i steng na sangs rgyas re bzhugs par gzigs nas bye ma bre gang yang bsnams so/ /de ltar tsandan sbrul gyi snying po la byon pa'i spyan ras gzigs/ tsandan gor shi Sha byang chub kyi ljon shing gi yal ga chu bo nai rAnydza ra'i bye ma/ ku sha'i 'jag ma phon gcig dben gnas chen po brgyad kyi sa la sogs te/ rgya gar gyi rdzas yi dam gyi lha la sogs pa dge slong gis spyan drangs te/ bod du byon nas rgyal po la phul bas shin tu dgyes par gyur to/ /de nas yang rgyal po'i thugs kyi dgongs pa la/ da rung lho bal gyi phyogs na/ sbas pa'i sprul sku/ phyi rabs sems can gyi don byed pa'i rten ngo