[A:92]bo rnams la yang chos kyi lhag ma ma lus par bstsal/ lo mtshams pa rnams la bug sgo so sor yud kyis phebs nas/ gegs sel dang gdams pa gnang ste bden pa mthong bar mdzad/ phal che bas ni 'phral du grub pa'i mtshan ma bstan pas chos rje yang mnyes/ bdun cu pa lcags mo glang gi lo hor zla bcu gcig pa'i tshes lnga'i nyin khrid gsar pa rnams la/ bla ma'i rnal 'byor rgyas par gnang nas 'di la rten 'brel thams cad sgrig dgos/ gal po che yin pas sgoms shig /de nas gdan sa bas gnang ngo gsung / tshogs pa la nges don rgya mtsho'i chos 'phro de nyin ches thugs gsal zhing / gzi mdangs che ba'i rnam pas lhag par gsung che bar gsungs te/ 'u cag gi chos bshad mtshams de ka la byed pa yin no gsungs nas chos 'phror bzhag /tshes drug gi nam langs ma thag 'od gsal la mnyam par bzhag nas dgongs mo mya ngan las 'das te/ mkha' khyab mkha'i rdo rje can yin mod na'ang / sprul pa'i sku ni zhing bde ba can du 'byor par zhal gyis mches so/ /zhag bdun gyi bar du gzi mdangs je cher song zhing / zhal 'dzum ston/ gsang ba sbubs su nub/ dbu'i gtsug tor 'phags pa la zla ba bdud rtsi'i lung / phyi nang rten 'brel gnad gcig pas gtsang po gyen la log ste gram pa'i mthil gyi rdo mthong ba byung / gdung zhugs la zhen pas ring bsrel yungs 'bru lta bu'i phung por gyur cing / spyan ras gzigs kyi sku byon/ bde ba can du tshe dpag med jo bo'i sku tshad ma dang / sku 'bum chen mor sku 'dra mthong ba don ldan bzhengs pa'i nang du ring bsrel phal che ba bzhugs so/ /bdag nyid chen po rigs ldan sprul pa'i sku 'di'i slob ma'i thu bo ni/ kun spangs chos grags dpal bzang po/ sa bzang ma ti paN chen/ lo tsA ba blo gros dpal/ chos rje phyogs las rnam rgyal/ dkon mchog rgyal mtshan/ chos dpal mgon po/ chos rje ring tshul