[B:༤༣༧]པཎྜི་ཏར་གྱུར་པ་དང༌། ཐུགས་རྒྱལ་ཆེར་སྐྱེས་ཏེ། མི་ཐུབ་ཟླ་བ་ཤི་བ་ན་གསང་སྔགས་གང་དུ་འགྲོ་ཞེས་གསུངས་པས། དེ་སློབ་དཔོན་བསོད་སྙོམས་པས་གསན་ནས། ང་ཡོད་བཞིན་དུ་དེ་སྐད་ཟེར་བ། ཁྱོད་ལ་ལས་ཀྱི་སྒྲིབ་པ་དཔག་ཏུ་མེད་པ་ཡོད་པས། དེ་སྦྱང་པའི་ཐབས་ལ་འབད་དགོས་ཞེས་གསུངས་པ་ལ། ཇི་ལྟར་བྱ་ཞེས་ཞུས་པས། སྲིན་བུ་པད་པའི་དོང་དུ་ཞག་བདུན་བསྡད་དགོས་ཞེས་གསུངས་ནས་བསྡད་པས། ཤི་ལ་ཐུག་པར་སོང་སྟེ། ཞག་བདུན་འདས་པ་དང༌། བླ་མའི་ཞལ་ནས་ཁྱོད་ཀྱིས་སྒྲིབ་པ་བྱང་སྟེ། དངོས་གྲུབ་དཔག་ཏུ་མེད་པ་ཐོབ་པར་འགྱུར་བས། སྒྲུབ་པ་གྱིས། གཞན་དོན་དུ་བསྟན་བཅོས་མང་པོ་རྩོམས་ཤིག་ཅེས་གནང་བ་ལ་བརྟེན་ནས། རྩ་རྒྱུད་ལ་དཀའ་འགྲེལ་ཀུ་མུ་ཏི་དང༌། སྒྲུབ་ཐབས་ཡན་ལག་དྲུག་པ། བདག་མེད་མའི་སྒྲུབ་ཐབས། འབྱུང་པོ་ཐམས་ཅད་པའི་གཏོར་མའི་ཆོ་ག ། །གུར་རིགས་བསྡུས་པའི་སྒྲུབ་ཐབས། དེ་ཐམས་ཅད་ཀྱི་དཀྱིལ་འཁོར་གྱི་ཆོ་ག་བཟང་པོ་ཡོངས་བཟུང་ཞེས་བྱ་བ་རྣམས་མཛད་དོ། ། །དེ་ལྟ་བུའི་སློབ་དཔོན་དེ་སྒྲིབ་པ་སྦྱང་དཀའ་བས་སྦྱང་དཀའ་ཟླ་བ་དང༌། རྩོད་པ་གཞན་གྱིས་ཐུབ་དཀའ་བས་ཐུབ་དཀའ་ཟླ་བ་ཞེས་ཀྱང་ཟེར་ཏེ། དེ་གཉིས་ཀ་ཡང་དུརྫ་ཡ་ཙནྡྲ་ཞེས་པའི་སྒྲ་ལས་འབྱུང་ངོ༌། ། །ཡང་གྲུབ་པ་ཐོབ་པར་བཞེད་པ་ལྟར་ན། སློབ་དཔོན་དེ་ནུབ་ཕྱོགས་ཨུ་རྒྱན་གྱི་ཡུལ་ཛ་ལནྡྷ་རའི་གནས་ན་སྒྲུབ་པ་མཛད་པའི་ཚེ། ཡུལ་དེའི་ཕྱོགས་གཅིག་ན་དམངས་ཕལ་པ་ཅིག་ལ། བུད་མེད་མཚན་ཉིད་དང་ལྡན་པ། ལས་རྒྱའི་རྟེན་དུ་རུང་བ་ཅིག་ཡོད་ལ། དེ་དམངས་ཕལ་པ་ཅིག་ལ་དགའ་ཞིང་