[B:422]kyi sku rang byung gi ye shes chen po zhes bya ba des/ rigs drug gi sems can thams cad kyi chos nyid rang bzhin gyi chos sku dang / ji lta ba bzhin du mngon du gyur pa'i sangs rgyas kyi thugs rtogs pa chos kyi sku'i ye shes dang gnyis su med pa'i chos nyid do/ / /bzhugs pa'i tshul/ chos kyi sku de kun rdzob tu chos thams cad du snang bas na/ de las byung ba'i tshul gyis khyab cing bzhugs la/ don dam pa dag pa dang / ma dag pa'i chos te/ de bzhin nyid du thim zhing 'gro bas na bdag nyid gcig pa'i tshul gyis bzhugs so/ / /dus ni/ dus gsum mnyam pa nyid du mi 'gyur bar rtag tu bzhugs shing / 'khor dang chos ni ston pa de nyid kyi rnam 'phrul te/ don dam par na phun sum tshogs pa lnga tha dad du grub pa med de/ rdo rje gur las/ 'di ni rang byung bcom ldan 'das/ / /lha yi bdag po gcig pu nyid/ / /thams cad bdag nyid rtag tu bzhugs/ / /zhes dang / de'i 'grel par/ 'di ni zhes bya ba ni/ 'dis ni rtag tu da ltar 'byung ba'o/ / /rang byung zhes bya ba ni/ don dam par rgyu la sogs pa med pa'i phyir ro/ / /bcom ldan 'das zhes bya ba la/ bha ga ni dbang phyug la sogs pa drug ste/ de 'di la yod pas bcom ldan 'das so/ / /de skad du/ dbang phyug dang ni gzugs bzang dang / / /dpal dang grags dang ye shes dang / / /brtsams pa phun sum tshogs ldan pa/ / /drug po 'di dag bcom par bshad/ / /ces sogs gsungs/ gcig pu zhes bya ba ni gnyis su med pa ste/ chos sku'i tshul gyis so/ / /zhes dang / sambu Ta las/ rang byung ngo bo 'di nyid ni/ / /chos kyi sku zhes rab tu