།དེ་ནས་ཡང་ཕྱོགས་བཞི་ཀ་ནས་ཀོང་ཇོ་དང་ལྷ་ཤཱཀྱ་མུ་ནེ་བྱོན་པར་གྱུར་ཏོ། །ཤར་ཕྱོགས་རྒྱ་མོ་རབ་ཁ་བྱ་བར་ཐོགས། ལྷོ་ཕྱོགས་བསེ་སྒྲོམ་གྱི་ཕུ་ན་འཁྱགས་པ་ཡོད་པས་དེ་ལ་ཀོང་ཇོ་ན་རེ། འདི་དུང་དཀར་གཡས་སུ་འཁྱིལ་བ་འདྲ་ཟེར། ནུབ་ཕྱོགས་ཕག་སྣའི་གདོང་དུ་ས་སྒོ་བྱེ་བ་དང༌། གནམ་སྒོ་བྱེ་བ་ལ་མགོན་པོ་མཆེད་ལྕམ་དྲལ་རྡོ་ལ་འབུར་དུ་དོད་པ་ཡོད་ཟེར་རོ། །བྱང་ལྷ་བསུ་གདོང་ན་བུས་བ་བྱེད་པ་ཡང་གནང༌། ལྷ་སའི་ནགས་ཀྱི་གསེབ་ནེ་ཆུང་གི་སྟོད་ན་ཆུ་མིག་གི་འདམ་དུ་ཤིང་རྟ་བྱིང་བ་དང༌། གྱད་ལྷ་དགས་སྐུ་བཏེགས། ཀླུ་དགས་ཤིང་རྟ་བཏེགས་ཏེ་འདམ་ནས་བཏོན་པས། ཤིང་རྟ་འགུལ་བར་མ་ནུས་སོ། །བསྐྱོད་པར་ག་ལ་ནུས། གྱད་གཉིས་ངལ་སོས་ནས་གྱད་ལྷ་དགས་སྐུ་བཏེགས་པས་འགུལ་བར་མ་ནུས་བསྐྱོད་པར་ག་ལ་ནུས་སོ། །གྱད་ལྷ་དགའ་དང་ཀླུ་དགའ་གཉིས་ཀ་ལོག་ནས་བཏེགས་པས་ཀྱང་སྐུ་དེ་ཤིན་ཏུ་ལྕི་བར་གྱུར་ནས་དེར་བཞུགས་ཏེ་ས་ལས་བྲལ་མ་ནུས་སོ། །ཀོང་ཇོས་སྙམ་ན་འདི་ཇི་ལྟར་ཡིན། ཅིའི་རྟགས་ཡིན་སྙམ་ཏེ། སྤོར་ཐང་སུམ་བརྒྱའི་གབ་རྩེ་བཏིང་ནས་ཇུ་ཞག་བརྩིས་པས། བོད་ཁ་བ་ཅན་གྱི་རྒྱལ་ཁམས་འདི་ས་གཞི་སྲིན་མོ་གན་རྐྱལ་ལ་འགྱེལ་བ་འདྲ་བར་མཁྱེན། ལྷ་སའི་འོ་ཐང་གི་མཚོ་སྲིན་མོའི་སྙིང་ཁྲག་ཏུ་མཁྱེན། ས་ཡུལ་དེ་ནི་སྙིང་ཁར་མཁྱེན། ཐང་འདིའི་དཀྱིལ་ན་རི་བོག་ཆད་དེ་གཉིས་སྙིང་གི་རུས་པ་སེམས་ཅན་ཐམས་ཅད་ཀྱི་སྲོག་ཟ་བའི་གནོད་སེམས་སུ་མཁྱེན། ཤར་གྱི་རི་སྣ་ནུབ་ཏུ་ཟུག་ནུབ་ཀྱི་རི་སྣ་ཤར་དུ་ཟུག ལྷོའི་རི་སྣ་བྱང་དུ་ཟུག བྱང་གི་རི་སྣ་ལྷོར་ཟུག་པ་དེ། མི་སྤྱོད་ངན་པ། ས་གཞི་ཐམས་ཅད་ཇག་པའི་སྐྱེ་བོས་གང་བར་མཁྱེན། དེ་བས་རྒྱ་ཆེར་བརྩིས་ཏེ་གཟིགས་པས། ཡུལ་དེའི་ཤར་ན་རི་པད་མ་ར་ག་སྤུངས་པ་འདྲ་བ་ཡོད། ལྷོ་ན་རི་རིན་པོ་ཆེ་སྤུངས་པ་འདྲ་བ་ཡོད། ནུབ་ན་རི་མཆོད་སྡོང་བཙུགས་པ་འདྲ་བ་ཡོད། བྱང་ན་རི་མན་ཇིའི་ཁར་དུང་ཆོས་ཆབ་ཀྱིས་བཀང་བ་བཞག་པ་འདྲ་བ་ཡོད། དེ་རྣམས་ནི་ས་ཕྱོགས་དེར་དད་པ་ཅན་གྱི་སྐྱེ་བོ་མང་པོ་འབྱུང་ཞིང་འདུ་བར་རང་རང་གི་ཡོན་ཏན་འབྱུངབའི་ལུང་དུ་མཁྱེན། དེར་དད་པ་ཅན་གྱི་སྐྱེ་བོ་མང་པོ་འབྱུང་བས་ངང་གིས་དད་པ་ཆེ་བ་དང༌། ཆོས་བྱར་རུང་བ་རང་བཞིན་གྱིས་ཡོན་ཏན་འབྱུང་བའི་གཞི་འཕེལ་ཞིང་རྒྱས་པར་བྱ་བའི་ཕྱིར། གཙུག་ལག་ཁང་ཞིག་བཞེངས་དགོངས་པར་མཁྱེན། དེ་ལ་དེའི་དཔྱད་མཛད་པས་སའི་དབྱེ་བ་སུམ་བརྒྱད་དང་དྲུག་ཅུ། སའི་དཔྱད་ནོར་རེ་རེ་བདུན་ཅུ་རྩ་གསུམ། དེའི་ངོས་བཟུང་བ་དགུ་བཅུ་ཐམ་པ། ངོས་བཟུང་པའི་སྐྱོན་ཟློག་པ། དེའི་འབྲས་བུ་ཆུད་མི་ཟ་བར་བྱེད་པ། དེ་ཐམས་ཅད་ཀྱང་བསྡུས་ན་བཞིར་འདུས་ཏེ། སྐྱེ་བོ་མང་པོ་འདུ་བའི་ས། རྒྱལ་པོའི་ས་གཏན་ལ་དབབ་པ་དང༌། འཕགས་པ་རབ་ཏུ་བྱུང་བའི་ས། གཙུག་ལག་ཁང་གི་ས་གཏན་ལ་དབབ་པ་དང་དྲང་སྲོང་མང་པོ་འབྱུང་བའི་གནས། དགོན་པའི་ས་གཏན་ལ་དབབ་པ་དང༌། རེ་ཞིག་བདེ་བར་སྤྱོད་པའི་ས། སྐྱེ་བོ་ཕལ་པོ་ཆེའི་ས་གཏན་ལ་དབབ་པའོ། །དེ་དག་ལས་ཀྱང་ད་རེས་དང་པོ་གཉིས་ཀྱི་ས་གཏན་ལ་འབེབས་ཏེ། དེ་ཡང་ཡོན་ཏན་རྣམ་པ་བརྒྱད་ཡོད་པ་ཞིག་དགོས། ཡོན་ཏན་བརྒྱད་ཡོད་པ་ལ་སྐྱོན་ལྔ་ཙམ་ཡང་ཡོང༌། ཡོན་ཏན་བརྒྱད་ཡོད་པ་ནི། གནམ་འཁོར་ལོ་རྩིམས་བརྒྱད་དུ་ཡོད་པ། ས་པད་མ་འདབ་བརྒྱད་དུ་ཡོད། བར་བཀྲ་ཤིས་རྟགས་བརྒྱད་ཀྱིས་བརྒྱན་པའི་ས། ཇུ་ཡག་གི་ལྷ་ཁང་ཚངས་པ། རིན་པོ་ཆེ་སྣ་ལྔ་ཡོད་པའ། དེའི་ནུས་པ་འདོན་པ་ལ་སྐྱོན་ལྔ་སེལ་དགོས་པར་མཁྱེན། སྐྱོན་ལྔ་ནི་ཀླུའི་ཕོ་བྲང་དང༌། འདྲེའི་འདུན་ཕུང་དང༌། མ་མོའི་ཉལ་ས་དང༌། བཙན་གྱི་རྒྱུ་སྲང་དང༌། འབྱུང་བའི་ས་དགྲ་དེ་རྣམས་རིམ་གྱིས་བཟློག་པ་ལ། ཀླུའི་ཕོ་བྲང་གི་ཁར་ཇོ་བོ་ཤཱཀྱ་མུ་ནེས་མནན་པར་མཁྱེན། སྐུའི་ཕྱོགས་བཞིར་ཀ་བ་བཞི་བཙུགས། དེ་ལ་དར་གྱི་ཡོལ་བ་བྲེས་ནས་གྱད་པ་མི་གཉིས་སྲུང་དུ་བཅུག་སྟེ། ཀོང་ཇོ་དཔོན་གཡོག་རྣམས་རྒྱལ་པོའི་ཕོ་བྲང་གི་ཤར་སྒོར་བྱོན་ནས། སྙེ་བོ་རྟ་པ་བརྒྱ་ཐམ་པས་སྒོ་བ་གཉིས་ལ་བརྡ་སྦྱར་ཏེ། ཁྱེད་རྒྱལ་པོའི་སྤྱཧ་སྔར་སོང་ལས། ཀོང་ཇོ་ཡང་སྤྱན་དྲོངས་ནས་ཡོད། གསེར་གྱི་ལྷ་ཤཱཀྱ་མུ་ནེ་ཡང་སྤྱན་དྲོངས་ནས་ཡོད།