དེར་ད་ལྟ་ཡང་སྨན་དྲི་ལ་སོགས་པ་བྱུག་གོ། །དེ་ལ་སྐུ་ཁྲུས་བྱས་པའི་ཆུས་ནད་པ་ལ་སོགས་པ་ཁྲུས་བྱས་པས་ནད་སོས་པ་དང༌། སྙིང་རླུང་ཞི་བར་འགྱུར་རོ། །བྱིན་རླབས་ཤིན་ཏུ་ཆེ་བ་ཞིག་བཞུགས་སོ། །དེའི་ཤར་ཕྱོགས་སྐོར་ལམ་ན་སྒྲོལ་མའི་སྐུ་བརྐྱངས་ཁྲུ་གང་པ་ཞིག་གི་སྟེང་ན། ཅོ་བ་རིའི་ལྷ་ཁང་འདོམ་གསུམ་པ་ཞིག་ཡོད་དོ། །དེ་དང་པོ་ཡོན་བདག་གིས་ཞལ་བྱང་དུ་བསྟན་ནས་བཞེངས་པ་ལ་སྐོར་བ་བྱེད་པའི་རྡུལ་གྱིས་གོས་པར། ཡོན་བདག་གི་བསམ་པ་ལ་བཅོམ་ལྡན་འདས་ལ་རྒྱབ་བསྟན་པ་འདི་མ་ལེགས་ཏེ། ཞལ་ལྷོ་ཕྱོགས་སུ་བསྟན་ནས་བཞེངས་རྒྱུ་ཡིན་པ་ལ་སྙམ་ནས་ཡིད་མི་བདེ་བ་ལས། དེའི་རྨི་ལམ་དུ་ཁྱེད་དེ་ཙམ་དུ་ཡིད་མི་བདེ་མི་དགོས། ང་རང་ཁ་ལྷོར་བལྟ་བས་ཆོག་ཟེར་ནས། སང་ནངས་པར་ལྷ་ཁང་དང་བཅས་པ་འགྱུར་འདུག་སྟེ། དེ་ལ་ཞལ་འགྱུར་ཏ་རེ་ཞེས་གྲགས་སོ། །དེའི་ཤར་གྱི་ཉེ་ལོགས་ན། སློབ་དཔོན་ཙན་དྲ་གོ་མིའི་ཐུགས་དམ་དུ་ཙན་དྲ་ལོ་ཀི་ཤྭ་ར་ཞེས་པའི་གཙོ་འཁོར་ལྔ་བྲག་རི་དང་བཅས་པ་རྡོ་ལ་བཞེངས་པ་བཞུགས་ཏེ། དེའི་ལྷ་ཁང་གན་དྷོ་ལ་འདོམ་དྲུག་ཡོད་དེ། དེ་བྱིན་རླབས་ཆེ་བས་སྤར་ཏི་འཛུགས་པ་མང་པོ་ཡང་ཡོང༌། ལྕགས་རིའི་ནང་ན་ལྷོར་འགྲོ་བའི་ལམ་གཡས་གཡོན་ན་མཆོད་རྟེན་དཔངས་སུ་འདོམ་གསུམ་པ་གཉིས་ཀྱི་ནང་ན། སྤྱན་རས་གཟིགས་དང༌། སེང་གེའི་སྒྲའི་སྐུ་རྡོ་ལ་བཞེངས་པ་ཡོད་དོ། །དེ་དག་བྱིན་རླབས་ཆེ་བ་ཡིན་སྐད་དོ། །སྐུ་དེ་གཉིས་ལས་འོད་འབྱུང་བས་དེ་བག་རེ་མཐོང་བ་ཡང་ཡོད། ལམ་དེའི་ཤར་ཕྱོགས་ན། བཅོམ་ལྡན་འདས་ཀྱིས་བདུད་སྡིག་ཏོ་ཅན་དཔའ་སྐོང་བའི་ས་ན། སྡིགས་པའི་ཅོ་བ་རི་ཞེས་པའི་ལྷ་ཀང་འདོམ་གསུམ་པ་གཅིག་གི་ནང་ན་བཅོམ་ལྡན་འདས་ཀྱི་སྐུ་ཚད་ཙམ་པ་བཞེངས་ནས་ཕྱག་ནམ་མཁའ་ལ་འཕྱར་བ། གཡོན་པ་དཀུ་ལ་བརྟེན་ནས། བདུད་ལ་སྡིགས་པའི་ཚུལ་མཛད་པ་ཞིག་བཞུགས་སོ། །བྱང་ཤར་མཚམས་ཀྱི་སྐོར་ལམ་གྱི་ནང་ན་རྡོ་སྦྲམ་པོ་བྱས་པའི་མཆོད་རྟེན་དཔངས་སུ་འདོམ་གསུམ་ཙམ་ཡོད་པ། ལོགས་ཀུན་ལ་སངས་རྒྱས་ཀྱི་སྐུ་བཞུགས་པ་ཞིག་ཡོད་དེ། སྔོན་འཕགས་པ་དགྲ་བཅོམ་པ་ཞིག་གིས་བཞེངས་ཏེ། དང་པོ་ལྕགས་རིའི་ཕྱི་རོལ་ན་དགའ་སྙམ་པ་ན་ནུབ་མོ་དེ་ལྕགས་རིའི་ནང་དུ་བྱོན་འདུག་སྐད། དེ་ལ་མཆོད་རྟེན་མགྲོན་པོ་ཆེ་ཟེར་རོ། །དེའི་ནང་ལོགས་ཉེ་བ་ན་མཆོད་རྟེན་གཞན་དང་མི་འདྲ་བ་འདོམ་གསུམ་ཙམ་པ་ཞིག་ནས། ལྷོ་ཕྱོགས་སུ་མདའ་རྒྱང་གང་ཙམ་ན། མཆོད་རྟེན་གཅིག་ཡོད་པའི་བར་དེ། སངས་རྒྱས་རབས་བདུན་གྱི་སྐུ་འཆག་ས་ཡིན་སྐད། ཤར་ལམ་དང་སྐོར་ལམ་གྱིས་བསྣོལ་བའི་མཚམས་ཀྱི་ནང་ལོགས་ན་རྡོའི་མཆོད་རྟེན་སྦྲམ་པོ་ལ་བྱས་པའི་འདོམ་གང་ཙམ་ཡོད་པའི་བུམ་པ་ལ་བཅོམ་ལྡན་འདས་ཀྱི་སྐུ་འབུར་དུ་དོད་པ་བཞུགས་པའི་མདུན་ན། རྡོའི་མཎྜལ་ཁྲུ་གང་ཙམ་པ་ཞིག་ཡོད་དོ། །དེའི་གཏམ་རྒྱུད་ནི་ལྷོ་ཕྱོགས་རྒྱ་མཚོའི་འགྲམ་ན་བུད་མེད་ཅིག་གིས་ཡོན་བདག་མོ་བྱས་ཏེ་བཞེངས་པ་ལ། བུད་མེད་དེས་འཆི་ཀར་ངའི་མཅོད་རྟེན་ལ་མཆོད་པ་འབུལ་མཁན་མི་ཡོང་བསམ་ཡོད་པ་ལ། མོའི་རྨི་ལམ་དུ་ཁྱོད་དེ་ཙམ་དུ་སེམས་སྡུག་མི་དགོས་པས། ང་རང་རྡོ་རྗེ་གདན་དུ་བྱོན་ནས། ད་ལྟ་ཡང་མཆོད་པ་རྒྱུན་མི་འཆད་དུ་བྱེད་པ་མང༌། དེ་བྱིན་རླབས་ཤིན་ཏུ་ཆེ་བས། མཆོད་རྟེན་མགྲོན་པོ་ཡིན་སྐད་དོ། །དེའི་ཉེ་ལོགས་སྐོར་ལམ་ན། རྡོའི་མཆོད་རྟེན་འདོམ་ཕྱེད་དོ་ཙམ་པ། སངས་རྒྱས་སྟོང་གི་སྐུ་གཟུགས་བཞུགས་པ་ཞིག་ཡོད་དོ། །དེ་ནི་ནཱ་ལེན་དྲ་ནས་བྱོན་པའི་མཆོད་རྟེན་མགྲོན་པོ་ཡིན་ཟེར། ཤར་པྱོགས་ཀྱི་སྟོད་ན་ཅོ་བ་རི་ལྷ་ཁང་འདོམ་དོ་ཙམ་ཨ་ཤོ་ཀ་ཏ་རེ་ཞེས་པ། ཕྱག་གཉིས་སྤྱི་བོའི་ཐོག་ཏུ་བསྣོལ་ཞིང་འགྱིང་ཆགས་པ་སྐྲ་ཁྲུ་གང་བ་ཙམ་ཡོད་པ། བྱིན་རླབས་ཅན་ཞིག་བཞུགས། དེ་ནས་དབུ་རྩེའི་མདུན་ཤར་ཕྱོགས་ལམ་གྱི་དཀྱིལ་ན་བཅོམ་ལྡན་འདས་ཀྱིས་རྡོ་ལ་ཞབས་བཞག་པས་བཀྲ་ཤིས་རྟགས་བརྒྱད་དང་བཅས་ཤིན་ཏུ་ལེགས་ལ་དོད་པའི་ཞབས་རྗེས་བྱོན་ཏེ། དེ་ན་རྒྱུ་རྡོ་བ་ལ་པད་མའི་གདན་བྱས་པ་ལ། འཕང་དུ་ཁྲུ་དོ་ཡོད་པའི་སྟེང་ན་རིང་ཚད་མཐོ་བརྒྱངས་པ་གསུམ་ཡོད་པ་ཞིག་བཞུགས། དེ་ནས་རྡོའི་རྟ་བབས་རི་དྭགས་དང་བཅས་པ་དང༌། བཟོ་ཁྱད་ངོ་མཚར་ཅན་གཞན་ཡང་ཡོད་པ་གཅིག་བཞུགས་པ་དེའི་དྲུང་ན་དྷརྨ་ཨ་ཤྭ་ཀའི་སྤྱི་བོར་མར་མེ་སྟོང་གི་མཆོད་སྡོང་བཞུགས་པའི་དངོས་པོ་ཡང་ཡོད་དོ།