རྒྱལ་རབས་ལྔ་ཁྲི་ལྔ་སྟོང་དང༌། བཅོ་བརྒྱད་སོང་གོང་དུ་དེ་དག་མ་གྲགས་སོ། །དེ་དག་ལ་ཚེ་ཚད་མེད་པའི་འཁོར་ལོས་བསྒྱུར་བའི་རྒྱལ་པོ་དྲུག་དང༌། གསེར། དངུལ། ཟངས། ལྕགས་ཀྱི་འཁོར་ལོས་བསྒྱུར་བའི་རྒྱལ་པོ་བཞི་དང་བཅུའོ། །གཞལ་དུ་མེད་པའི་རིན་པོ་ཆེའི་ཕུང་པོ་ནི་བདེ་བར་གཤེགས་པ་སྟེ། བཅུ་གཅིག་པོ་ནི་ཆེ་བ་ཡིན་ལ། གཞན་ནི་དེ་ལྟར་མ་ཡིན་ནོ། །མང་པོས་བཀུར་བ་ནས་སྲས་སྒྲ་གཅན་འཛིན་ཡན་ཆོད་དུ། མི་རབས་འབུམ་ཕྲག་བཅུ་གཉིས། ཁྲི་ཕྲག་ལྔ༌། བརྒྱ་ཕྲག་གཉིས། དགུ་བཅུ་རྩ་བཞི་སངས་རྒྱས་གོ་ལྔ་བྱུང་སྟེ་ཚེ་ལོ་དཔག་ཏུ་མེད་པ་ནས། ལོ་བརྒྱད་བརྒྱ་ལོན་ཞིང་ལོ་རེ་རེ་བྲི་བས། ཚེ་ལོ་བརྒྱ་པ་ཡན་ཆད་འདས་སོ། །དེ་ནས་སངས་རྒྱས་ཀྱི་བསྟན་པ་དངོས་ནི། ལོ་བཞི་བཅུ་ཞེ་དྲུག་དང༌། གཟུགས་བརྙན་ལྔ་སྟོང་གནས་ཏེ། ཚེ་ལོ་ལྔ་བཅུ་པ་ན། བསྟན་པ་ནུབ་པར་འགྱུར་རོ། །ད་ལྟ་བར་གྱི་བསྐལ་པ་ཉི་ཤུའི་ཡ་ཐོག་རིང་མོའི་དང་པོ་ཡིན་ཏེ། སངས་རྒྱས་སྟོང་འབྱུང་བ་ལས། དབྱིག་ལྡན་གྱི་མདོ་དང༌། དགོངས་པ་འདུས་པ་དང༌། སྟོང་ཆེན་རབ་འཇོམས་རྣམས་ལས། སངས་རྒྱས་བདུན་བྱོན་པར་བཤད་དེ། གསེར་ལུང་མཐུན་པའི་མདོ་དང༌། ཤེར་ཕྱིན་སྣང་བའི་མདོ། གསང་བ་བསམ་གྱིས་མི་ཁྱབ་པའི་མདོ་དང༌། བསྐལ་པ་བཟང་པོའི་མདོ་དང༌། འདས་པའི་སངས་རྒྱས་རབས་བཞི་ལྔར་བྱོན་པར་བཤད་དོ། །འདི་དག་ནི་རེ་ཞིག་ཆོས་མངོན་པ་ལས་བྱུང་བའི་རྒྱལ་པོའི་རིམ་པ་ཡིན་ཏེ། རྒྱལ་རབས་འདི་ནི་ཆོས་མངོན་པ་ནས་བཤད་པ་དང༌། འཇིག་རྟེན་བཞག་པ་ནས་ཇི་ལྟར་གསུངས་པ་བཞིན་ནོ། །བདེ་བར་གཤེགས་པའི་ཡོན་ཏན་ལ་བསྔགས་པའི། །བློ་གྲོས་གསལ་བ་རྣམས་ཀྱིས་ཕྱོགས་ཀུན་ཏུ། །འགྲོ་བ་རྣམས་ཀྱི་རྣ་བར་སྒྲོགས་པར་མཛོད། །སངས་རྒྱས་གསུང་རབ་ཡོན་ཏན་རྟོགས་པར་འགྱུར། །ཤཱཀྱའི་རབས་ཀྱི་རྣམ་ཐར་རྒྱལ་རབས་འདི། །བསྟན་ལ་དད་པ་རྣམས་ལ་འཕེལ་བར་མཛོད། །བསོད་ནམས་དཔག་ཏུ་མེད་པ་ཐོབ་པར་ནི། །བཅོམ་ལྡན་འདས་ཀྱི་ཞལ་ནས་གསུངས་པ་ལགས། །བོད་ཡུལ་གངས་རིའི་ཁྲོད་འདིར་འགྲོ་བ་མིས་ཇི་ལྟར་བཟུང་བའི་ལུགས་ནི། སྔོན་སངས་རྒྱས་ཤཱཀྱ་ཐུབ་པ་འཇིག་རྟེན་དུ་མ་བྱོན་པའི་གོང་དུ། རྒྱ་གར་གྱི་ཡུལ་དུ་རྒྱལ་པོ་དྲང་སྲོང་རྒྱས་པ་ཞེས་བྱ་བ་ལ། བུ་ཡུལ་འཁོར་སྐྱོང་དང་སྐྱ་བསེང་གཉིས་བྱུང་བ་ལ་ཡུུལ་འཁོར་སྐྱོང་ལ་བུ་སྒྲ་ངན་དང༌། འཐབ་དགའ་དང༌། རྣ་བ་ཅན་ལ་སོགས་པ་བརྒྱ་ཐམ་པ་བྱུང་བ་ལ། སྐྱ་བསེང་ལ་བུ་སྲིད་སྒྲུབ་དང༌། གཡུལ་ངོར་བརྟན་པ་དང༌།
༼སྲིད་སྒྲུབ་ཀྱིས་ཁ་ལོ་བ་རང་ཉིད་ཀྱིས་བྱས་ཏེ། གཡུལ་བཀྱེ་བས་འཐབ་དགའི་རིགས་དཔུང་གི་རིགས་བཅོ་བརྒྱད་དང་བཅས་པ་བརླག་པར་གྱུར་ཏོ། །རུ་པ་ཏི་ཞེས་བྱང་བའི་རྒྱལ་པོ། དཔུང་གི་ཚོགས་ཤིག་དང་བཅས་པས་གཡུལ་འགྱེད་པའི་ཚེ། བུད་མེད་ཀྱི་ཆ་ལུགས་བྱས་ནས་བྲོས་ཏེ། རི་ཀ་བ་ཅན་གྱི་ཁྲོད་དུ་ཞུགས་ཏེ། གནས་པའི་རིགས་དེ་ལ་བོད་ཅེས་གྲགས་པ་ཡིན་ནོ། །སློབ་དཔོན་ཤེས་རབ་གོ་ཆས་གསུངས་སོ། ༽
འཇིགས་སྡེ་དང༌། རིས་མེད་དང༌། ལྷར་བཅས་དང་ལྔ་བྱུང་ངོ༌། །ཡང་མཆེད་པོ་དེ་དག་མ་འཆམས་ཏེ་འཁྲུག་པ་ཆེན་པོ་བྱས་སོ། །དེའི་ཚེ་ལྷ་ཁྱབ་འཇུག་ཆེན་པོས་སྲིད་སྒྲུབ་ཀྱི་རོགས་བྱས་ཏེ། དགྲ་ངན་དཔུང་ཚོགས་བཅོ་བརྒྱད་དང་བཅས་པ་བརླགས་པར་བྱས་སོ། །དམག་རྒྱལ་པོའི་བུ་ཆུང་ཤོས་རུ་པ་ཏི་ཞེས་བྱ་བའི་རྒྱལ་པོ་འཁོར་དང་བཅས་པས། སྲིད་སྒྲུབ་ཀྱི་དམག་གིས་འཇིགས་ཏེ། བུད་མེད་ཀྱི་ཆས་སུ་ཞུགས་ཏེ། རང་གི་ཇོ་བོ་བསད་པའི་འཁོར་མི་བྱའོ། །ཞེས་བརྗོད་ནས་རི་གངས་ཅན་གྱི་ཁྲོད་དུ་བྲོས་ནས་འདུག་པས། དེའི་རིགས་འཕེལ་བ་དང༌། བོད་ཡུལ་ཁ་བ་ཅན་གྱི་མི་ཞེས་བྱ་བར་གྲགས་པ་ཡིན་ནོ། ཞེས་ལྷ་ལས་ཕུལ་དུ་བྱུང་བའི་འགྲེལ་པ་༼སློབ་དཔོན་བདེ་སྤྱོད་བཟང་པོས་མཛད་པ། ༽
དང་སློབ་དཔོན་ཤེས་རབ་གོ་ཆས་མཛད་པ་ལས་བཤད་དོ། །དེ་ནས་མངའ་རིས་སྟོད་མི་རྣམས་དེ་ལས་འཕེལ་ཟེར་བ་ཡོད་དོ། །བོད་རྣམས་ནི་འཕགས་པ་སྤྱན་རས་གཟིགས་དབང་ཕྱུག་གི་སྤྲུལ་པ་སྤྲེའུ་བྱང་ཆུབ་སེམས་དཔའ་ལས་བྱུང་བའི་གཏམ་རྒྱུད་ནི་འདི་ལྟར་བཤད་པར་བྱ་སྟེ། བདེ་བ་ཅན་གྱི་ཞིང་ཁམས་སུ་མངོན་པར་རྫོགས་པར་སངས་རྒྱས་པའི་མགོན་པོ་ཚེ་དཔག་ཏུ་མེད་པ་འདིས་འཇིག་རྟེན་ཁམས་མཐའ་ཡས་པ་ནས།