ནམ་མཁའ་ལ་ལྷེབ་ལྷེབ་ཕུར་ནུས་པ། ལག་ཆ་ནི་སྐྱ་མོ་ཁུགས་སུ་བཅུག ལྤགས་པ་ནི་རླ་བཞི་འཕྲེང་དུ་བཀུག་ནས་ཕུབ་པ་མིང་དུ་ཕྱེད་ལྔ་ཟེར། ཡས་རྟགས་ནི་ཤིང་དང་རུས་པ་ལ་སྔོན་དམར་གྱི་རི་མོ་བྲིས། གཟུགས་བརྙན་ནི་ཁམས་ས་ལ་བྱེད། ནམ་མཁའ་དང་རྒྱང་པུ་ནི་བཙུགས། གསོན་གྱི་ལྷ་བོན་བྱེད་ཟེར་ནས་གཡའ་རི་དང་གངས་རིའི་ལྷ་འདྲེ་ལ་ཞུང་ཤང༌། སྲབ་ཤང༌། གསེར་སྐྱེམས་ཀྱིས་མཆོད། གཤིན་དུར་བྱེད་ཟེར་ནས་མི་ཤི་བ་ལ་གོ་གནོན་དང༌། སྐྱིད་ཀྱི་ལྷ་ལུག་དང༌། རྟ་རྒོད་མ་གསོད། མི་ན་བའི་གླུད་དུ་ངེས་པ་མེད་ཟེར་ནས་ར་ལུག་དང༌། བྱ་ཕག་དང༌། ཡས་ཐག་གཏོང་ཟེར་ནས་སྲོག་ཆགས་གསོད། ཡང་ན་འཐོམ་སྟོང་ཞིང་འགལ་དུམ་དང་འདྲེ་ཡས་སྐྱུར་བ། ཨ་ཡ་ཆབ་ནག་བྱ་བ་གཅིག་བྱུང༌། དེ་རྒྱལ་པོས་སྤྱན་དྲངས་ནས་ཆབ་ནག་སྲིད་པ་རྒྱུད་ཀྱི་བོན་བྱ་བ་གཅིག་བྱུང༌། བོད་ཡུལ་དུ་གྱེར་བོན་ལ་སྔ་བ་དེ་ཡིན་ནོ། །དེ་སྟོན་པའི་བཀའ་ནི་མ་ཡིན་སྐད། རེས་དགེ་བ་ཙུག་བྱེད། རེས་མི་དགེ་བ་ཙུག་བྱེད། བཞུགས་མ་རུང་སྟེ་རྒྱལ་པོ་པོས་རལ་གྲི་གླང་བྱས་སོ་བྱ་བ་ཀླད་ལ་བསྐོར་བས་འོད་ཀྱི་ལྷ་ཐག་ཆད་ལྷ་སྲིན་འཁྲུགས་ཏེ་ཐུགས་འགྱུར་ནས་ཁ་ཆེའི་རྒྱལ་པོ་ལ་དམག་དྲངས་གཡུལ་སྤྲད་དེ། བོད་དམག་རྒྱལ་ནས་ཚུར་ལོག་པ་དང༌། བོད་ཀྱི་དཔའ་བོས་གཞུ་ཀ་བ་ཙམ་ལ་མདའ་ཕྱམ་ཙམ་འཕངས་པས་ཤིང་སྡོང་ལ་མདའ་ཕིགས་འདུག་ནས། མདའ་དེ་མཐོང་བ། ལ་ལ་ན་རེ་རྒྱལ་པོ་ཡིན་ཟེར། ལ་ལ་ན་རེ་བློན་པོ་ཡིན་ཟེར་ནས། དེ་དག་གང་ཡིན་བརྟག་པའི་དོན་དུ་རྒལ་པོའི་དྲུང་དུ་སྙན་ཕྲ་བྱས་པས་འབངས་ལོ་ངམ་གྱིས་ཆད་པ་བྱུང་གིས་དོགས་ནས། རྩལ་འགྲན་པར་འདོད་ན་སུ་ཡོང་བ་དེ་མ་ཧེ་ལ། སོལ་ཕྱེ་ཁོལ་ལ་བྱོན། རྒྱལ་པོའི་དཔྲལ་བ་ལ་མེ་ལོང་ཐོགས་ལས་བྱོན། ཕོ་བྲང་གསེར་གཡུས་ཁོང་ལས་བྱོན་བྱས་པས། རྒྱལ་པོས་དེ་ལྟར་བྱས་བྱོན་པས་རོལ་མོ་དང་ཁུ་སྒྲ་ཆེན་པོ་བྱས་པས་མ་ཧེ་འགྲོགས་ཏེ་སོལ་ཚུབ་ཆེན་པོ་བྱུང༌། ཆིབས་གོང་དུ་མེ་ལོང་ལྷག་ལྷག་བྱས་པས། མདའ་འཕངས་པས་རྒྱལ་པོ་ལ་ཟུག་སྟེ་རྗེ་ཉིད་འབངས་ལོ་ངམ་གྱིས་བཀྲོངས་སོ། །དེ་སྤུར་བྱུང་སྟེ་མིང་ཡང་གྲི་གུམ་བཙན་པོ་ཟེར། སྤུར་ནི་གྲང་མོ་གྲང་ཆུང་གི་ཟུར་ལ་ཡོད་དོ། །དེ་ལ་སྲས་གསུམ་ཡོད་ཀྱང་རྒྱལ་སར་ཚུད་པ་སྤུ་དེ་གུང་རྒྱལ་དུས་སུ་ལྟོང་བྱུང་ཟེར་རོ། །དེར་བཙུན་མོ་ནས་མྱ་ངན་བྱས་ཏེ་གཉིད་དུ་སོང་པའི་རྨི་ལམ་དང་ནི་དཀར་པོ་གཅུག་བྱུང་བས་འདོད་བསྟེན་པ་རྨིས་སོ། །དེ་ནས་ཟླ་བ་བཅུ་ན་བུ་གཅིག་བཙས་ཏེ་རྐང་ལག་མེད་ཁ་དང་ངེ་བ་གཅིག་འདུག དེ་བསད་དུ་ནི་བུ་ཡིན། གསོ་རུ་ནི་ཡག་ལག་མི་འདུག་པས་གཡག་རུའི་ནང་བཅུག་ནས་ཁར་མར་འོ་མ་གཏོར་བས་ཆེར་སོང་བ་དང་ཡག་ལག་སྐྱེས་ནས་ལྷམ་གྱི་ཡུ་བས་གོས་བྱས་ཏེ་གསོས་པས་མིང་ནི་འདྲེའི་བུ་ཕོ་རུ་ལྷམ་སྐྱེས་སུ་བཏགས་སོ། །དེ་འཚར་བ་དང་རིག་པ་ཅན་ཞིག་བྱུང་ནས་བློན་པོ་ཁུ་ཞེས་བྱ་བར་གྲགས། དེ་ལ་རྒྱལ་པོ་གྲི་གུམ་གྱི་སྲས་གསུམ་སྤྱུགས་པ་བཙལ་བ་ནི་ཤ་ཀྲི་ཁྲི་ཀོང་པོར་སྤྱུགས་པ་ཀོང་རྗེ་དཀར་པོ་ཡིན་ཏེ་གདུང་ཆད། ཉང་ཁྲི་ཉང་པོར་སྤྱུགས་པས་ཉང་བཙུན་རྒྱལ་པོ་ལགས་ཏེ་དེ་ཡང་གདུང་ཆད་དོ། །བྱ་ཀྲི་ཁྲི་སྤྲེའུ་སྤུ་སོར་སྤྱུགས་པས་སྤུ་བོ་ནས་སྤྱན་དྲངས་པས་སྤུའི་རྒྱལ་པོ་རྩད་པོ་ཟེར་རོ། །མཚན་ཡང་སྤུ་རྗེ་གུང་རྒྱལ་དུ་གྲགས་སོ། །བོན་པོ་དར་ཧ་ཏོས་སྐུ་བསྲུངས་སོ། །དེའི་སྲས་ཨ་ཤོ་ལེགས། བོན་པོ་ཚེ་མི་ཀུན་སྣང་གིས་སྐུ་བསྲུངས་སོ། །དེའི་སྲས་ཨི་ཤོ་ལེགས་སོ། །བོན་པོ་ཨ་ལ་དུན་ཚེས་སྐུ་བསྲུངས་སོ། །དེའི་སྲས་གོ་རུ་ལེགས་སོ། །བོན་པོ་ཨ་སོ་གཙུག་སྤུད་ཀྱིས་སྐུ་བསྲུངས་སོ། །དེའི་སྲས་དགེ་ཤོ་ལེགས་སོ། །བོན་པོ་དོན་རྟོགས་རྒྱལ་པོས་སྐུ་བསྲུངས་སོ། །དེའི་སྲས་འབྲང་རྗེ་ལེགས་སོ། །བོན་པོ་ཞང་ཞུང་ཁྲི་ལྡེས་སྐུ་བསྲུངས་སོ། །དེའི་སྲས་ཐེ་ཤོ་ལེགས་སོ། །བོན་པོ་ཨ་ལ་དུན་ཅུག་གིས་སྐུ་བསྲུངས་སོ། །དེ་རྣམས་ལེགས་དྲུག་བྱ་བ་ཡིན་ནོ། །དེ་རྣམས་ཀྱི་སྤུར་དོན་མཁར་གཡའ་སྤངས་མཚམས་སུ་བཏབ་པོ། །ཐེ་ཤོའི་སྲས་རྒྱལ་ས་ནམ་ཟིན་ཏེ། དེའི་སྲས་གནམ་སྤུའོ། །གཞུང་བཙན་ལྡེ། དེ་གཉིས་བོན་པོ་ཁུ་མང་བཞེར་གཉན་གྱིས་སྐུ་བསྲུངས་སོ།