།ད་ནི་ཁ་བ་ཅན་གྱི་སེམས་ཅན་རྣམས་ལ་ཐེག་པ་ཆེན་པོའི་ཆོས་ཤིག་འབྱུང་བར་བྱ་དགོངས་པས། དེ་ཡང་བལ་པོའི་ཡུལ་ནས་སངས་རྒྱས་འོད་སྲུངས་ཀྱིས་བྱིན་གྱིས་བརླབས་པའི་བཅོམ་ལྡན་འདས་ཇོ་བོ་མི་སྐྱོད་རྡོ་རྗེ་དང༌། བྱམས་པ་ཆོས་ཀྱི་འཁོར་ལོ་དང༌། ཙན་དན་གོ་ཤི་རྵའི་སྒྲོལ་མ་རང་བྱུང་གསུམ་བཞུགས་སོ། །རྒྱ་ནག་པོའི་ཡུལ་ན་བཅོམ་ལྡན་འདས་ཤཱཀྱ་ཐུབ་པའི་སྐུ་ཚབ་བཞུགས་པ་བསྟན་པའི་ཕྱིར། ཙན་དན་སྦྲུལ་གྱི་སྙིང་པོ་ལ་བྱོན་པའི་ཇོ་བོ་ཐུགས་རྗེ་ཆེན་པོའི་མཛོད་སྤུ་ནས་འོད་ཟེར་གཉིས་འཕྲོས་ཏེ། གཅིག་ནུབ་ཏུ་སོང༌། གཅིག་ཤར་དུ་སོང་བས་ནུབ་ཏུ་སོང་དེ་བལ་པོའི་ཡུལ་ཡམ་བུ་ཡམ འགལ་ན་བལ་པོའི་རྒྱལ་པོ་གུ་ན་ཀཱ་མ་ཧཱ་དེ་བ་ཧོ་ཤ་ཁྲི་པའི་སྲས་བྷི་ཧམ་ལོ་བི་པ་དེ་བ་ཞེས་བྱ་བ་ལ་ལྷ་གཅིག་ཁྲི་བཙུན་བྱ་བ་བུ་མོ་ལོ་བཅུ་དྲུག་ལོན་པ། སྐུ་མདོག་དཀར་ལ་དམར་བའི་མདངས་ཆགས་པ། མཚན་དང་དཔེ་བྱད་དུ་ལྡན་པ། ཁ་བྱད་ལྟ་བས་ཆོག་མི་ཤེས་པ་གྲོང་པའི་ཆོས་ཀྱིས་མ་ཕོག་པ། ཁ་ནས་ཨུཏ྄པལ་སྔོན་པོའི་དྲི་བྲོ་བ། རིན་པོ་ཆེའི་བང་མཛོད་ལ་མངའ་བ་ཞིག་ཡོད་པ་དེ་འོད་དེ་ལ་བརྟེན་ནས། བལ་པོའི་ཡུལ་དང་རྒྱལ་པོ་རཏ྄ན་དེ་བ་ཡང་ཚུལ་དེ་ལྟར་བྱས། རྒྱལ་པོས་ཀྱང་དེ་ཁོ་ན་བཞིན་གཟིགས་སོ། བུ་མོ་དེ་བོད་དུ་སྤྱན་འདྲོངས་པ་ན་སྐུ་དེ་གསུམ་ཡང་བོད་དུ་བྱོན་ནས། ལྷོ་བལ་ན་བཞུགས་པའི་ཆོས་དང་ཡི་གེ་འབྲུ་གཅིག་ཀྱང་མ་ལུས་པར་འབྱུངས་པར་གཟིགས་སོ། །ཤར་དུ་སོང་བའི་འོད་ཟེར་དེས་རྒྱ་ནག་པོའི་ཡུལ་ཀེའུ་ཤིང་ཁྲི་སྒོ་ན་ཀོང་རྩེ་འཕྲུལ་གྱི་རྒྱལ་པོའི་སྲས་རྒྱུད་རྐོང་རྩེ་འཕྲུལ་ཆུང་བཙན་པ་ཞེས་བྱ་བ་ལ། ལྷ་གཅིག་ཨོང་ཇོ་བྱ་བ་བུ་མོ་ལོ་བཅུ་དྲུག་ལོན་པ་སྐུ་མདོག་སྔོ་ལ་དམར་བའི་མདངས་ཆགས་པ། ཨུཏ྄པལ་སྔོན་པོའི་མདོག་འདྲ་བ། མཚན་དང་དཔེ་བྱད་དུ་ལྡན་པ། ཁ་བྱད་ལྟ་བས་ཆོག་མི་ཤེས་པ། ཁ་ནས་ཙན་དན་ཧ་རིའི་དྲི་བྲོ་བ། བེར་ཆུང་ཆུ་ཞིང་གབ་པ་བདུན་བརྩེགས་གོན་པ། རིག་པའི་བསྟན་བཅོས་ལ་མངའ་བརྙེས་པ་ཞིག་ཡོད་པ། རྒྱ་ནག་གི་ཡུལ་དང་རྒྱ་རྗེ་བཙན་པ་ཡང༌། རྒྱལ་པོས་འོད་བྱུང་བ་དེ་ལ་བརྟེན་ནས་དེ་ཁོ་ན་བཞིན་དུ་གཟིགས་སོ། །བུ་མོ་དེ་སྤྱན་འདྲོངས་ན་སྐུ་དེ་དང་རྒྱ་ནག་པོའི་ཡུལ་ན་ཡོད་པའི་ཆོས་དང༌། རིག་པ། གཙུག་ལག་མ་ལུས་པ་བོད་དུ་འབྱུང་བར་གཟིགས་སོ། །སང་ནངས་པར་སྔ་དྲོ་བློན་པོ་རྣམས་རྒྱལ་པོ་ལ་ཕྱག་བྱ་བར་ཕྱིན་པ་ལ། རྒྱལ་པོ་རྒྱ་ཕོར་ན་ཇ་གསོལ་ཞིང་ཡེངས་མ་གཏམ་དུ་མ་ད། མདང་གསུམ་ངའི་རྨི་ལམ་ན་ནུབ་ཕྱོགས་བལ་པོའི་ཡུལ་ན་བུ་མོ་དཀར་མོ་གཅིག་འདུག་པ་རྨིས། ཤར་ཕྱོགས་རྒྱ་ནག་པོའི་ཡུལ་ན་བུ་མོ་སྔོན་མོ་གཅིག་འདུག་པར་རྨིས། ཞེས་རྨི་ལམ་དུ་བྱུང་བ་གསུངས་པ་དང༌། བློན་པོ་ཐོན་མི་སམ་བྷོ་ཌ་མི་ཆུང་གིས་གཡོན་ངོས་ནས་ཕྱག་བྱས་ནས། བུ་མོ་དེ་གཉིས་ངོས་ཀྱིས་གདན་འདྲོངས་པར་བྱེད་དོ་ཞེས་ཞུས་སོ། །ཡང་གཡས་ངོས་ནས་བློན་པོ་མགར་སྟོང་བཙན་ཡུལ་བཟུང་གིས་འབྲས་ཆང་རྒྱ་ཕོར་གང་འདྲེན་ཞིང་ཕྱག་བྱས་ཏེ། རྒྱལ་པོའི་རྨི་ལམ་དེ་གཞན་སུ་ལ་ཡང་མི་བཟླས་པར་ཞུ། བུ་མོ་དེ་གཉིས་བདག་གིས་གདན་འདྲེན་པར་བགྱིའོ། །ཞེས་ཞུས་སོ། །དེ་ནས་བློན་པོ་གཉིས་ཀྱི་བསམ་པ་ལ་རྒྱལ་པོས་བུ་མོ་གཉིས་རྨི་ལམ་དུ་བྱུང་གསུངས་པ་དེ། དེ་གཉིས་ངའི་བཙུན་མོར་ཁུག་བྱ་བ་ཡིན་ངེས་སྙམ་ནས་གྲོང་ཁྱེར་གྱི་གཙོ་བོ་རྣམས་ལ་ཡང༌། སང་ནངས་པར་གྲོང་རེ་རེ་ནས་ལྷ་སའི་ན་ཐང་དང་ནགས་ཀྱི་མཚམས་འོ་ཐང་གི་མཚོ་འགྲམ། གླ་བའི་ཚལ་ཆུ་མིག་གི་འགྲམ། ཤིང་སྟར་ཀའི་བསིལ་གྲིབ་ལ་འདུན་མ་ལ་ཚོགས་ཤིག འདུན་རྐྱེན་རེ་ཡང་ཁྱེར་ལས་ཤོག་ཅིག་ཅེས་བསྒོའོ། །དེར་ནངས་པར་གྲོང་ཁྱེར་གྱི་གཙོ་བོ་བདུན་ཚོགས་པ་ན་འདུན་རྐྱེན་བསྡུས་པས་གཉིས་ཀྱིས་ཤ་རྐང་པ་རེ་རེ་བྱུང༌། གཉིས་ཀྱིས་ཤ་ལག་པ་རེ་རེ་བྱུང༌། དེ་ཚོ་བསྒྲིགས་པས་ཤ་ཁོག་མ་ཉམས་པ་གཅིག་ཚང་བར་བྱུས་བས། དེ་ལ་ཤིས་པ་བརྗོད་ཅིང་འདུན་རྐྱེན་ལེགས། བཀྲ་ཤིས་པས་ད་སྨོན་ནེ་ཁ། འདུན་མ་ཡང་རྒྱ་མ་ཆུང་ཞིག་ཟེར་བས། དེ་ལ་བློན་པོ་མགར་སྟོང་བཙན་ཡུལ་བཟུང་ན་རེ། འོ་ན་རྒྱལ་པོའི་ཞལ་ནས། ཤར་ནུབ་གཉིས་ན་བུ་མོ་ལྷ་གཅིག་སྔོན་མོ་གཅིག་དང༌།