po chen po mgar gyis mgo byas snye bo rta pa brgya tham pa rgyal po rgya rje btsan po'i pho brang du lhags so/ /dus mnyam du stag gzig nor gyi rgyal po dang / khrom ge sar dmag gi rgyal po dang / rgya gar chos kyi rgyal po dang / bod kyi rta pa brgya po thams cad 'dzoms so/ /de nas so so'i mjal ba'i phyag rten rnams phul nas bod kyi blon pos rgya nag gi blon po la gser gyi bang ba bskur nas/ nged bod kyi rgyal po'i blon po yin pas/ rje lha gcig dang mjal ba'i zhu 'phrin bka' shog sgrom bu dang bcas pa yang yod ces pas/ khong blon po gzhan pas dma' bar byas nas rgyal po dang zhag bdun du ma mjal lo/ /de nas mjal ba'i tshe blon po mgar gyis sna drangs pa'i blon po rnams kyis phyag gral byas/ blon po mgar gyis dong rtse bdun phyag rten du phul/ rgyal po la phyag dang zhe sa dang rdzogs par phul te rgyal po'i mdun du baiDUrya'i rmog bzhag ste/ lo tsA ba bar du bcug nas zhus pa/ rje lags/ bdag cag mtha' 'khob kyi rgyal po srong btsan sgam po'i blon po lags/ rin po che baiDUrya'i rmog 'di gon nas g.yul du zhugs na g.yul las rnam par rgyal bar 'gyur/ nad yams byung pa'i tshe na 'di gon nas grong khyer gyi mtha' bskor na nad yams chad nus/ lo nyes kyis dogs pa'i tshe yang 'di gon nas zhing mtha' bskor na lo legs par 'ong / ngo mtshar bas 'dzam bu'i gling na rin thang gzhal du med pa 'di rje la 'bul bar bgyi/ nor bu chu shel 'di yang lha gcig gi rin du 'bul/ lha gcig 'phrul gyi kong jo bdag cag mtha' 'khob kyi rgyal po'i btsun mor gnang bar zhu zhus pa la/ rgyal po 'khor dang bcas pa bzhad gad byed do/ /der rgyal po na re/ khyed mtha' 'khob kyi rgyal po spobs pa re mtho/ nga sangs rgyas 'od srungs nas rgyal po'i rgyud pa rgyun ma chad pa yin la/ nga la chos khrims dar gyi mdun pa 'dra ba yang yod/ rgyal khrims gser gyi gnya' shing 'dra ba yang nga la yod/ khyed nga'i gnyen zla ma yin/ 'on kyang sa thag ring po nas yong zin pa yar song la khyed rang gis rgyal po la dris/ rgyal po bya ba la chos dge ba bcu'i khrims dgos pa yin/ khyod bod la khrims med pas bod kyis chos dge ba bcu'i khrims bca' nus sam/ de 'cha' 'dod na lha gcig sbyin/ mi nus na mi ster bas dris las shog gsungs pas/ slar yang blon pos phyag byas/ rje lha gcig lags/ nged 'phrin re re la rgya nag dang bod la yar 'gro mar 'gro byas na lha gcig spyan 'dren pa'i dus mi 'ong / nged cag gi rgyal pos bka' shog sgrom bu 'di bskur ba lags/ 'di gzigs su gsol zhes bka' shog sgrom bu phyag tu phul lo/ /rgyal pos kha phye nas gzigs pas/ rgya nag stong 'khun gyi yi ge mthing shog la gser gyis bris nas/ mtha' 'khob kyi rgyal po srong btsan sgom pos/ rgyal nag rgyal po seng ge btsan pa la bka' bstsal pa/ lha gcig btsun mo kong jo 'di nga'i btsun mor phul zhig khyed nged la khrims med pa la snyad byed na/ ngas sprul pa'i mi mang po sprul nas bod yul du chos dge ba bcu la brten pa'i khrims nyi ma gcig la bca' bar bya yi de ltar byas kyang lha gcig mi ster na ngas dmag dpag tu maid pa sprul la khyed kyi rgyal khams thams cad 'joms par 'gyur ro bya ba'i yi ge 'dug nas/ rgya nag rgyal po skrag cing dngas te 'on kyang